ەۋرو-2016: رەسەي سلوۆاكيادان جەڭىلىپ قالدى
كەزدەسۋ فرانسيانىڭ ليلل قالاسىنداعى «پول مورۋا» ستاديونىندا ءوتتى.
ويىن باستالىسىمەن دوپتى رەسەي قۇراماسى ءوز باقىلاۋلارىندا ۇستاپ وتىردى. دەگەنمەن قاقپاعا قاۋىپتى شابۋىل جاسايتىنداي ۇلكەن قاۋقار كورسەتە المادى. العاشقى گولدى كەزدەسۋدىڭ 32-مينۋتىندا سلوۆاكيا ساپىنان ۆلاديمير ۆايس سالدى. رەسەيلىكتەر بۇل گولعا قارىمتا گول سالۋعا سونشالىقتى اسىعىستىق تانىتپادى. سول سىلبىر قيمىلى ءۇشىن سلوۆاكتار ورىستاردى تاعى ءبىر مارتە جازالادى.
ەكىنشى گولدىڭ اۆتورى 45-مينۋتتا مارەك گامشيك اتاندى. ەكىنشى تايمدا دا ويىن سىلبىر ءوتتى. تەك ويىن سوڭىندا رەسەيلىكتەر شابۋىلدا بەلسەندىلىك تانىتا باستادى. ويىنعا جاڭادان شىققان گلۋشاكوۆ كەزدەسۋدىڭ 80-مينۋتىندا ەسەپتى 2:1-گە جەتكىزدى. وسى گولدان سوڭ شابىت العان رەسەي قۇراماسى ءۇستى-ۇستىنە شابۋىل جاساۋعا تىرىستى. الايدا كۇش سارقىلعاندىقتان، قارسىلاس كوماندانىڭ قاقپاسىنا دوپ ەنگىزۋ مۇڭ بولدى. قورىتىندى ەسەپ - 2:1 سلوۆاكتاردىڭ پايداسىنا شەشىلدى.
وسىلايشا توپتىق كەزەڭنىڭ قورىتىندى تۋرى الدىندا رەسەيلىك قۇرامانىڭ ەنشىسىندە 1 عانا ۇپاي بار. ال سلوۆاكتاردا 3 ۇپاي. ەرتەڭ انگليامەن وينايتىن ۋەلس كومانداسىندا دا 3 ۇپاي بار.
سونداي-اق، بۇگىن شۆەيتساريا قۇراماسى رۋمىنيامەن بولعان ويىندا جەڭىلىستەن امان قالدى.
پاريجدە «پارك دە پرەنس» ستاديونىندا وتكەن ماتچ 1:1 ەسەبىمەن اياقتالدى. ال فرانسيا - البانيا كوماندالارى اراسىنداعى ويىن فرانسۋزداردىڭ جەڭىسىمەن اياقتالدى. بۇگىن مارسەلدەگى «ۆەلودروم» ستاديونىندا وتكەن ماتچ 2:0 ەسەبىمەن اياقتالدى.
ويىننىڭ العاشقى مينۋتتارىندا-اق الاڭ يەلەرى شابۋىلدى ۇدەتتى. الايدا، ديدە دەشام شاكىرتتەرى ويىننىڭ 90 مينۋتىنا دەيىن گول سوعا المادى. تەك، ويىن بىتەرگە جاقىنداعاندا عانا الاڭعا جاڭادان شىققان انتۋان گريزمانن اديل ءراميدىڭ پاسىن ءساتتى پايدالانىپ، قارسىلاستىڭ قاقپاسىنا باسپەن گول سالدى.
وسى گول فرانسۋزدارعا قانات ءبىتىرىپ، ويىننىڭ 96 مينۋتىندا ديميتري پايە 2- گولدىڭ اۆتورى اتاندى. ول ماتچتىڭ ۇزدىك ويىنشىسى اتاندى.
ەۋروپا بىرىنشىلىگى فرانسيانىڭ ون قالاسىندا 10- ماۋسىم مەن 10- شىلدە ارالىعىندا وتەدى. بارلىق ماتچتار «قازاقستان» مەن «قازسپورت» تەلەارنالارىندا تىكەلەي ەفيردە كورسەتىلەدى.
ەۆرو-2016-نىڭ كەلەسى كەزەڭىنە ءار توپتان ەكى مىقتى كوماندا شىعادى. سونداي-اق ءۇشىنشى ورىن العاندار قاتارىنان 4 كوماندا جولداما الادى.
اۆتور: جاسۇلان جولدىبايەۆ