قازاقستان 2016 -جىلعى وليمپيادادان ەكى التىن الۋى مۇمكىن
14:55, 17 - اقپان 2016
استانا. قازاقپارات - گوللانديالىق Infostrada سپورت اگەنتتىگى وسى جىلى تامىزدا ريو- دە- جانەيرودا وتەتىن جازعى وليمپيادالىق ويىندارعا قاتىستى ءوز مەدالدىق بولجامىن جاڭارتتى، دەپ حابارلادى Sports.kz.
وسى ۇيىم ماماندارىنىڭ بولجامىنشا، برازيلياداعى التىن ناگرادالاردى قازاقستاندىق يۆان دىچكو (بوكستا)، الەكساندر زايچيكوۆ (اۋىر اتلەتيكادا) يەلەنۋى مۇمكىن.
وليمپيادانىڭ كۇمىس جۇلدەلەرى ءبىزدىڭ جەرلەستەرىمىز دانيار ەلەۋسىنوۆكە (بوكس)، زۋلفيا چينشانلو، نيجات راحيموۆ جانە جاسۇلان قىدىربايەۆقا (بارلىعى - اۋىر اتلەتيكا)، سونداي- اق المات كەبىسبايەۆقا (گرەك- ريم كۇرەسى) «بۇيىرادى».
گوللانديادا تالداۋشىلاردىڭ بولجامىنشا، وتانداستارىمىز ولگا رىپاكوۆا (جەڭىل اتلەتيكا)، ادىلبەك نيازىمبەتوۆ، ۆاسيلي ليەۆيت جانە جاسۇلان ءالىمحان ۇلى (بارلىعى - بوكس)، كارينا گوريچيەۆا مەن الماس وتەشيەۆ (ەكەۋى دە - اۋىر اتلەتيكا)، ەلدوس سمەتوۆ (دزيۋدو) قولا جۇلدەگە لايىق.