وليمپيادا-2016: ەكى قازاقتىڭ ورىنىن باساتىن ادام جوق - الەكسەي ني
ءنيدىڭ ايتۋىنشا، قازىرگى ۋاقىتتا قازاقستاننىڭ اۋىر اتلەتيكا فەدەراتسياسىنىڭ «ب» سىناماسىن اشپاۋ تۋرالى شەشىمىمەن كەلىسۋگە تۋرا كەلىپ وتىر. «زەرتحانا «ا» سىناماسىندا تىيىم سالىنعان زاتتاردىڭ بار ەكەندىگىن انىقتادى، «ب» سىناماسىندا دا راستايدى. ەگەر سىنامانى باسقا زەرتحانادا اشسا ءۇمىتىمىز سونبەيتىن ەدى. ولار ءوز سىنامالارىن ەشكىمگە بەرمەيدى، وعان سەبەپ تە جوق. قازىرگى تاڭدا ىشكى تەكسەرىس جۇرگىزىلىپ جاتىر، ول اياقتالعان كەزدە سايكەس قورىتىندى جاسالىپ، حالىقارالىق فەدەراتسياعا (IWF) جولدانادى، ول جاقتا ولار ءوز شەشىمدەرىن شىعارادى»، - دەدى ول.
سونىمەن قاتار، باس باپكەر جارىسقا شامامەن 16 ادامنىڭ جولداما العانىن، ال ليتسەنزيالار سانى التاۋ عانا ەكەنىن ايتتى. «بۇل سالماق دارەجەسىندە وليمپيادا ويىندارىندا مەدال الۋعا ەشقانداي دا مۇمكىندىگىمىز جوق. وتەشوۆتى دە، قىدىربايەۆتى دا الماستىراتىن ادام جوق. ولاردىڭ تەڭى جوق. باسقا كاتەگوريالارعا ءۇمىت ارتامىز. بىلۋىمشە، ۆلاديمير سەدوۆ شىقپايدى. ونىمەن بايلانىسىمىز ۇزىلگەن، ول كوماندادان دا، قۇرامادان دا كەتىپ قالعان. ءوزى دايىندالىپ جۇرگەن، سوسىن سپارتاكيادادا جاراقات الدى، وسىدان كەيىن تىنىشتىق ورنادى»، - دەدى مامان.
ەسكە سالايىق، حالىقارالىق اۋىر اتلەتيكا فەدەراتسياسى (IWF) قازاقستاندىق اۋىراتلەتتەر الماس وتەشوۆ، جاسۇلان قىدىربايەۆ جانە ەرمەك ءومىرتايدى دوپينگ قولداندى دەپ ايىپتاپ، ۋاقىتشا شەتتەتكەن بولاتىن.