قازاقستان 2016 - جىلدان باستاپ مەديتسينا ونىمدەرىنىڭ بىرەگەي نارىعىنا ەنەدى
«كەدەندىك وداق اياسىنداعى ەكونوميكالىق كەڭىستىك بويىنشا جاسالعان كەلىسىمگە سايكەس، ءبىز از عانا ۋاقىتتىڭ ىشىندە قازاقستان، رەسەيمەن، بەلارۋس ەلىمەن بىرلەسىپ، 50 گە تارتا نورماتيۆتىك-قۇقىقتىق اكتىلەردى بىرىزدەندىرەمىز. جالپى زاڭنامالاردى سايكەستەندىرۋ باعىتىندا قازاقستان باسقا ارىپتەستەرىنە قاراعاندا الدىڭعى قاتاردا كەلەدى»، - دەيدى مينيستر ساليدات قايىربەكوۆا.
ونىڭ ايتۋىنشا، كەدەندىك وداق اياسىندا ارىپتەس مەملەكەتتەر اراسىندا جالعان ءدارى-دارمەكتەر بويىنشا ءوزارا اقپارات الماساتىن بىرەگەي اقپاراتتىق ورتالىق جۇمىسىن جانداندىرۋ دا قاجەت ەتىلەدى. بۇل رەتتە ۆەدومستۆو باسشىسى جالعان مەديتسينالىق ونىمدەردىڭ حالىقارالىق مالىمەتتەر بازاسىنا قولجەتىمدىلىك 2015 - جىلى قازاقستاننىڭ سىناق ورتالىعى ىسكە قوسىلعاننان كەيىن عانا مۇمكىن بولاتىنىن ايتتى. ال ەلىمىزدەگى سىناق ورتالىعى ناقتى مالىمەتتەرمەن قامتىلۋى ءۇشىن ونىڭ ەۋروپالىق جەلىگە قوسىلۋى قاجەت.
بۇدان بولەك، مينيستر بۇگىنگى تاڭدا قازاقستان حالىقتىڭ دەنساۋلىعىنا قاۋىپ توندىرەتىن مەديتسينالىق ونىمدەردى بۇرمالاۋ جانە وعان قاتىستى ورىن الاتىن قىلمىستار بويىنشا ەۋروپا كەڭەسىنىڭ كونۆەنتسياسىنا قوسىلۋعا نيەتتى ەكەنىن جەتكىزدى. «بۇل - الەمدىك ۇدەرىس. «مەديكريم» اتالاتىن وسى كونۆەنتسيا - بۇل وسى سالاداعى قىلمىسى ءۇشىن قىلمىستىق جاۋاپكەرشىلىكتى قاراستىراتىن تۇڭعىش حالىقارالىق قۇرال»، - دەدى مينيستر.
اۆتور: قانات مامەتقازى ۇلى