ەۋرو-2016: فينالىندا فرانسيا جەڭەدى دەپ ۇتىسقا 200 مىڭ رۋبل تىككەن ازامات پويىز استىنا سەكىردى
17:37, 12 - شىلدە 2016
استانا. قازاقپارات - يجيەۆسكتە ەر ادام پويىز استىنا سەكىردى. بۇعان ەۋرو-2016 ويىنىنداعى فرانسيانىڭ ۇتىلىسى سەبەپ بولعان.
قۇقىق قورعاۋ ورگاندارىنداعى اقپارات كوزى حابارلاعانداي، فيدەل ن. ماتچ الدىندا كوماندا جەڭەدى دەپ ۇتىسقا بار جيعان اقشاسىن - 200 مىڭ رۋبل تىككەن.
ەۋرو-2016 ويىنىنىڭ فينالى وتكەننەن كەيىنگى كۇنى ەر ادام پويىز استىنا سەكىردى. ماشينيست شۇعىل تۇردە پويىزدى توقتاتتى، دەگەنمەن وقيعا قايعىلى اياقتالدى. 27 جاستاعى ەر ادام جاقىنداپ كەلە جاتقان پويىزدان نەبارى 50 مەتر جەردە تۇرعان.
انىقتالعانداي، فيدەل ن. دوستارىنا قارجىدان قاتتى قىسىلىپ جۇرگەنىن ايتقان. الدىن الا بولجام بويىنشا ەر ادام ءىرى كولەمدەگى بورىشىن وتەۋ ءۇشىن ۇتىسقا بار اقشاسىن تىككەن.