ورالدان « قازاقستان ارۋى - 2015» بايقاۋىنا قوس ارۋ قاتىسادى - فوتو
ولار «نۇر وتان» پارتياسى وبلىستىق فيليالى عيماراتىنىڭ زالىندا وتكىزىلگەن «ورال قالاسى ارۋى - 2015» بايقاۋىندا وزىپ شىقتى.
قالا كۇنىنە وراي جۇلدىز قۇسپانوۆا جەتەكشىلىك ەتەتىن «Star Models Studio» اتتى ءسان اگەنتتىگى ۇيىمداستىرعان بايقاۋعا بارلىعى 12 ارۋ قاتىسىپ، باق سىنادى. بىرىنەن- ءبىرى وتەتىن سۇلۋلار وزدەرىن تانىستىرۋمەن بىرگە قازاقستان حالقى اسسامبلەياسىنىڭ 20 جىلدىعىنا وراي ءتۇرلى ۇلتتاردىڭ ۇلتتىق كيىمدەرىمەن، سونداي- اق «ماريا حانىم» ءسان ءۇيىنىڭ كيىم ۇلگىلەرىمەن ساحناعا شىقتى. كورەرمەندەر تاراپىنان قويىلعان ساۋالدارعا جاۋاپ بەرىپ، ءوز ورە دەڭگەيلەرىنىڭ قانشالىقتى ەكەندىگىن كورسەتتى. شىعارماشىلىق سىننان دا مىڭ بۇرالا بيلەپ، ءساتتى وتە ءبىلدى.
سايىس قورىتىندىسىندا ون سەگىز جاسار ۆەرونيكا زالاتا «ورال قالاسىنىڭ ارۋى - 2015» بايقاۋىنىڭ باس جۇلدەسىن جەڭىپ السا، قالامقاس فايزوللا - ءبىرىنشى، ساۋلەش بيسەماليەۆا ەكىنشى ورىندى يەلەندى. سونىمەن قاتار ارۋلار ءتۇرلى اتالىمدار بويىنشا دا ماراپاتتالدى. جەڭىمپاز- جۇلدەگەرلەرگە ورال قالاسى اكىمدىگى تاراپىنان باعالى سىيلىقتار تاپسىرىلدى.