استانادا «شاپاعات-2015» اتتى ونەرتاپقىشتار اراسىنداعى جارىستىڭ جەڭىمپازدارى ماراپاتتالدى - فوتو
ونەرتاپقىشتاردى ىنتالاندىرۋعا باعىتتالعان بۇل بايگە بەس نوميناتسيادان تۇرادى. اتاپ ايتساق، جەڭىمپازدار «جىل ونەرتابىسى»، «ونەرتاپقىش ايەل»، «ەڭ جاس ونەرتاپقىش»، «جاس دارىن» جانە «ەڭ بەلسەندى ونەرتاپقىش» اتتى بەس اتالىم بويىنشا ماراپاتتالىپ وتىر.
«جىل سايىن ەلىمىزدەگى ونەرتاپقىشتاردىڭ سانى، ولاردىڭ ويلاپ تاۋىپ جاتقان ادىستەرى مەن قۇرالدارىنىڭ ساپاسى ارتىپ كەلەدى. ال ايەلدەر اراسىندا ۇزدىك ونەرتاپقىشتاردى انىقتاۋ قيىنعا سوقتى. سەبەبى ولاردىڭ دا سانى مەن ساپاسى وسكەن. بولاشاقتا ونەرتاپقىشتار ەلىمىزدىڭ ونەركاسىبىنە ۇلكەن جاڭالىقتار اكەلىپ، قازاقستاندى تەحنولوگيالىق، يننوۆاتسيالىق دامىعان الەمنىڭ الدىڭعى قاتارلى ەلدەردىڭ قاتارىنا قوسۋىنا سەپتىگىن تيگىزەدى دەپ ويلايمىن»، - دەيدى ق ر ينۆەستيتسيالار جانە دامۋ مينيسترلىگى تەحنيكالىق جانە ينۆەستيتسيالىق دامۋ دەپارتامەنتى ديرەكتورىنىڭ ورىنباسارى قۇرالباي بۇحارباي.
ەندى جەڭىمپازداردى اتاپ وتسەك، «شاپاعات-2015» بايقاۋىنىڭ قورىتىندىسى بويىنشا ونەركاسىپ سالاسىندا «روتورلى- پورشەندى ىشتەن جانۋ قوزعالتقىشىن» جاساپ شىعارعان فەدور وليفيرەنكو «ەڭ ۇزدىك جىل ونەرتابىسى» اتالىمى بويىنشا جەڭىمپاز اتاندى. «ەڭ ۇزدىك ونەرتاپقىش- ايەل» بويىنشا جەلدى گەنەراتورلاردىڭ پاتەنتتەرىنە اۆتورلاس الميرا جيلكاشينوۆا ۇزدىك دەپ تانىلدى. «ەڭ بەلسەندى ونەرتاپقىش» بولىپ جاڭارتىلعان ەنەرگيا سالاسىندا 15 پاتەنتتىڭ يەسى الەكساندر سلوجەنيكين اتانسا، «ەڭ جاس ونەرتاپقىش» اتاعىنا 17 جاسار نۇركەن ماراتوۆ لايىق دەپ تانىلدى. ال قىزىلوردا وبلىسىنىڭ تۋماسى، 11-سىنىپ وقۋشىسى باعلان تولەباي توعىزقۇمالاق ويىنىنىڭ ەلەكتروندىق الىپپەسىن جاساپ، «جاس دارىن» اتالىمىن جەڭىپ الدى. جەڭىمپازدارمەن قاتار وسى سالاداعى ءبىرقاتار ازاماتتارعا قازاقستاننىڭ يننوۆاتسيالىق دامۋىنا قوسقان ۇلەسى ءۇشىن شاپاعات ديپلومدارى تابىس ەتىلدى.
ايتا كەتەيىك، بيىلعى بايقاۋدىڭ وتۋىنە ادىلەت مينيسترلىگى، ءبىلىم جانە عىلىم مينيسترلىگى، ينۆەستيتسيا جانە دامۋ مينيسترلىگى ۇلەس قوسقان.