سايلاۋ -2015: قىزىلوردادا ءىرى ساۋدا ورىندارى تۇتىنۋشىلارعا «اركىمنىڭ داۋىسى ماڭىزدى» ەكەنىن ەسكەرتۋدە

قىزىلوردا. قازاقپارات - اركىمنىڭ داۋىسى ماڭىزدى! قىزىلوردالىق كاسىپكەرلەر ق ر پرەزيدەنتىن سايلاۋعا قانشا كۇن قالعانىن تۇرعىنداردىڭ ەسىنە سالۋدا، دەپ حابارلادى وبلىستىق كاسىپكەرلەر پالاتاسىنىڭ باسپا ءسوز قىزمەتىنەن.

 «اتامەكەن» ۇلتتىق كاسىپكەرلەر پالاتاسىنىڭ باستاماسىن قولداۋشىلاردىڭ ءبىرى - «ال- اساد» دۇكەندەر جەلىسى. ساۋدا ورتالىعىندا 15000 نان استام ءونىم تۇرلەرى حالىققا ۇسىنىلدى. بارشا قازاقستاندىقتار ءۇشىن ماڭىزدى شارادا ال-اسادتىقتار وتاندىق ونىمدەرگە «اركىمنىڭ داۋىسى ماڭىزدى!» اتتى ستيكەرلەردى جاپسىرۋ ارقىلى تۇتىنۋشىلارىن سايلاۋعا قاتىسۋعا شاقىرۋدا.

بۇل جونىندە «ال-اساد» دۇكەندەر جەلىسىنىڭ ماركەتولوگى التىنبەك ماۋلەنوۆ «ءبىزدىڭ سۋپەرماركەتتەر جەلىسى تاۋارلاردىڭ كەڭ ءتۇرىن ۇسىنۋ ارقىلى قازىرگى زامان تۇتىنۋشىلارىنىڭ سۇرانىستارىنا ساي قىزمەت كورسەتۋدە. «اركىمنىڭ داۋىسى ماڭىزدى!» اكسياسى باستالعالى ءبىز قازاقستاندىق تاۋارلارعا ارنايى ستيكەرلەردى جاپسىرۋ ارقىلى تۇتىنۋشىلاردى ماڭىزدى شاراعا شاقىرۋعا اتسالىسۋدامىز»، - دەدى.

اتالمىش دۇكەننىڭ تۇتىنۋشىلارىنىڭ ءبىرى سارسەنگۇل قۇرمانبايەۆا: «مەن كۇندەلىكتى تۇرمىسقا قاجەتتى تاۋارلاردى وسى جەردەن ساتىپ الامىن. مىنا تاۋارلارداعى ستيكەرلەر مەن ارنايى كۇنتىزبەلەر سايلاۋعا قانشا كۇن قالعاندىعىن ەسكە سالىپ وتىرۋىمەن ۇنادى. سوندىقتان بارشا جەرلەستەرىمدى سايلاۋ كۇنى داۋىس بەرۋگە شاقىرامىن»، - دەپ ءوز ويىمەن ءبولىستى.

ايتا كەتۋ كەرەك، ارنايى ستيكەرلەر وبلىستاعى 20 دان استام ءىرى تاۋاروندىرۋشىلەر مەن ساۋدا ورتالىقتارىنىڭ تاۋارلارىندا جاپسىرىلسا، 400-گە جۋىق كاسىپكەرلىك نىساندارىندا ارنايى كۇنتىزبەلەر ىلىنگەن.

اۆتور: ەلۋباي اۋەزوۆ