سايلاۋ-2015: كانديدات ءا. قۇسايىنوۆتىڭ ايماقتىق سايلاۋالدى شتابتارى جەتەكشىلەرىنىڭ سلەتى ءوتتى
ءىس-شاراعا پرەزيدەنتتىككە كانديدات ءا. قۇسايىنوۆتىڭ بارلىق ايماقتىق سايلاۋالدى شتابتارىنىڭ جەتەكشىلەرى مەن قىزمەتكەرلەرى، سەنىمدى وكىلدەرى قاتىستى.
شارانى قازاقستان رەسپۋبليكاسى پرەزيدەنتتىگىنە كانديداتتىڭ رەسپۋبليكالىق سايلاۋالدى شتابى ايماقتاردا جۇرگىزىلگەن ناسيحات جۇمىستارىنىڭ الدىن الا قورىتىندىسىن شىعارۋ ءۇشىن ۇيىمداستىرعان بولاتىن.
سلەت بارىسىندا ءا. قۇسايىنوۆ شارا قاتىسۋشىلارىنا وڭىرلەردە جۇرگىزگەن جۇمىستارى جايلى جانە جوسپارى تۋرالى بايانداپ بەردى.
ءابىلعازى قۇسايىنوۆ بەلسەندى ۇگىت-ناسيحات جۇمىستارىن جۇرگىزىپ، سايلاۋشىلارمەن جوعارى دەڭگەيدە كەزدەسۋلەر ۇيىمداستىرعانى ءۇشىن ايماقتىق سايلاۋالدى شتابتاردىڭ جەتەكشىلەرى مەن سەنىمدى وكىلدەرىنە العىسىن ءبىلدىردى.
«قازاقستان رەسپۋبليكاسىنداعى سايلاۋ تۋرالى» ق ر كونستيتۋتسيالىق زاڭىندا بەكىتىلگەن ۋاقىت ارالىعىندا سىزدەردىڭ قولداۋىڭىزبەن ءوز كانديداتۋرامنىڭ ۇلەسىنە 132 مىڭ داۋىس جيناپ، تىركەۋدەن ءساتتى ءوتتىم.
وسى ۋاقىتتان بەرى ۇيىمداستىرۋشىلىق جۇمىستار قىزۋ باستالىپ، دەمالىسقا دا، مەرەكەگە دە قاراماستان بىردە-ءبىر رەت باسەڭسىگەن ەمەس.
جولدىڭ جارتىسىنان كوپ بولىگىن ارتقا تاستادىق، ەندى «ساعاتتارىمىزدى تەڭەستىرىپ»، ۇگىت- ناسيحات ناۋقانىنىڭ قالعان ۋاقىتىندا اتقارار جۇمىسىمىزدى ودان ءارى جەتىلدىرۋ ءۇشىن ەسكەرتۋلەرىڭىز بەن ۇسىنىستارىڭىزدى تىڭداسام دەيمىن»، - دەدى ءا. قۇسايىنوۆ.
ءىس-شارا بارىسىندا رەسپۋبليكالىق جانە ايماقتىق سايلاۋالدى شتابتاردىڭ جەتەكشىلەرى بايانداما جاسادى.
وسى ورايدا رەسپۋبليكالىق شتاب جەتەكشىسى ر. جولامان ق ر پرەزيدەنتتىگىنە كانديدات ءا. قۇسايىنوۆتىڭ سەنىمدى تۇلعالارىنىڭ بەلسەندى جۇمىسىنا ءوز باعاسىن بەردى.
«ەسەپتىك كەزەڭدە ماقساتى ءبىر ادامداردىڭ بەرىك كومانداسى قۇرىلىپ، سونىڭ كۇشىمەن سايلاۋ ناۋقانىنىڭ ءبىرىنشى اينالىمىنان - ق ر پرەزيدەنتتىگىنە كانديداتتى تىركەۋ كەزەڭىنەن ءساتتى وتتىك. ايماقتاردا سايلاۋالدى شتابتاردى اشۋ ماسەلەلەرىن دە سىزدەردىڭ قولداۋىڭىزبەن ورىندى شەشە الدىق.
ناسيحات جۇمىستارىنا قاجەتتى كورنەكى ماتەريالدار جوعارى دەڭگەيدە ازىرلەنىپ، ءتيىستى ورىندارعا ۋاقتىلى جەتكىزىلدى»، - دەپ اتاپ ءوتتى ر. جولامان.
سونداي-اق، ر. جولامان ايماقتارداعى شتابتاردىڭ جۇمىس ناتيجەسىن كورسەتەتىن كەيبىر سانداردى مىسالعا كەلتىرىپ ءوتتى.
ر. جولاماننىڭ ايتۋىنشا، ۇگىت- ناسيحات ناۋقانى كەزىندە رەسپۋبليكا بويىنشا كانديداتتىڭ 36 بيلبوردى ورناتىلىپ، 25 مىڭ پلاكاتى ءىلىندى، 10 مىڭ باعدارلاماسى تاراتىلدى. تەلەارنالاردا ەكى ناسيحات روليگى كورسەتىلىپ، 7 ايماقتاعى سايلاۋشىلارمەن 18 كەزدەسۋ ۇيىمداستىرىلدى، وعان 540 تان اسا ادام قاتىستى. سونىمەن قاتار 214 ادامنان قۇرالعان سەنىمدى وكىلدەر كومانداسى قۇرىلدى.
ءسوزىن قورىتىندىلاي كەلە، ر. جولامان الداعى ۋاقىتقا جوسپارلانعان مىندەتتەردى ايقىنداپ بەردى.
سونىمەن قاتار سلەتتە كانديداتتىڭ اقمولا، سولتۇستىك قازاقستان، پاۆلودار، قاراعاندى جانە قوستاناي وبلىستارىنداعى سايلاۋالدى شتابتارىنىڭ جەتەكشىلەرى ءسوز الدى.
ايماقتىق سايلاۋالدى شتاب جەتەكشىلەرىنىڭ ايتۋىنشا، كانديدات ايماقتاردا سايلاۋشىلارمەن، جۇمىسشىلار ۇجىمىمەن ءبىرقاتار كەزدەسۋلەر وتكىزىپ، ءوز سايلاۋالدى تۇعىرناماسىنا قاتىستى سۇراقتارىنا جاۋاپ بەردى.
«سولتۇستىك قازاقستان وبلىسىندا كانديدات جۇمىسشىلار ۇجىمىمەن ءۇش كەزدەسۋ وتكىزىپ، وندا ەكولوگيا جانە ونەركاسىپتىك قاۋىپسىزدىك تاقىرىپتارىنا قاتىستى ءبىراز كۇردەلى ءارى وزەكتى ماسەلەلەر كوتەردى. اتاپ ايتقاندا، ءا. قۇسايىنوۆ «سيەۆكازەنەرگو» كاسىپورنىنىڭ، « قىزىلجار سۋ» كوممۋنالدىق مەكەمەسىنىڭ جۇمىسشى ۇجىمىمەن كەزدەستى. كەزدەسۋدە سايلاۋشىلار كانديداتتىڭ سايلاۋالدى تۇعىرناماسىنىڭ نەگىزگى باعىتتارىمەن تانىستى.
سونىمەن قاتار ءابىلعازى قۇسايىنوۆ ايماقتاعى شتاب جۇمىسىمەن تانىسىپ، ءبىرقاتار تاپسىرمالار بەردى»، - دەدى س ق و- داعى سايلاۋالدى شتابىنىڭ جەتەكشىسى ولگا كليشينا.
«قوستاناي وبلىسىندا كانديدات جەرگىلىكتى جۇرتشىلىقپەن كەزدەستى. كەزدەسۋگە كەلگەندەر ءا. قۇسايىنوۆقا سايلاۋالدى تۇعىرناماسىنا قاتىستى سۇراقتار قويىپ، وعان ناقتى ءارى تولىمدى جاۋاپ الدى. وبلىستا جۇمىس جالعاسىپ جاتىر»، - دەپ اتاپ ءوتتى قوستاناي ايماقتىق شتابىنىڭ جەتەكشىسى باۋىرجان تيبەيەۆ.
قاراعاندى وبلىسىنداعى ايماقتىق شتاب جەتەكشىسى اقجولوۆا گۇلجان مۇحامەت قىزى دا قازاقستان رەسپۋبليكاسى پرەزيدەنتتىگىنە كانديدات ءا. قۇسايىنوۆتىڭ سەنىمدى وكىلدەرىنىڭ بەلسەندى جۇمىسىن ەرەكشە اتاپ ءوتتى.
«ءبىزدىڭ وڭىردە كانديداتىمىزدىڭ سايلاۋشىلارمەن جەكە كەزدەسۋى جوسپارلانباعان، سوعان قاراماستان سەنىمدى وكىلدەرى ونىڭ سايلاۋالدى تۇعىرناماسىن ءتۇسىندىرۋ بويىندا بەلسەندى جۇمىس جۇرگىزىپ جاتىر. ايماقتىق شتاب جۇمىسىنىڭ قارقىنى دا جوعارى. بارلىق قاجەتتى ماتەريالدار قولىمىزدا بار. جالپى، وبلىستىڭ بارلىق اۋداندارىنداعى كانديداتتىڭ سەنىمدى وكىلدەرى سايلاۋشىلارمەن جۇمىسىن ءتيىستى دەڭگەيدە اتقارىپ جاتىر»، - دەپ اتاپ ءوتتى گۇلجان اقجولوۆا.
ءىس-شارا بارىسىندا ايماقتىق شتابتار ءوز ارا تاجىريبە الماسىپ، كەزدەسۋگە قاتىسۋشىلاردىڭ ساۋالدارىنا رەسپۋبليكالىق شتابتىڭ زاڭگەرلەرى مەن ەسەپشىلەرى جاۋاپ بەردى.
جالپى، شتابتار سلەتىندە كانديداتتىڭ ايماقتىق شتابتارىنىڭ قىزمەتكەرلەرى مەن سەنىمدى وكىلدەرىنىڭ بەلسەندى جۇمىسىنا جوعارى باعا بەرىلدى.