سايلاۋ-2015: كانديدات ءا. قۇسايىنوۆ اقتوبە كولىك، كوممۋنيكاتسيا جانە جاڭا تەحنولوگيالار كوللەدجىنىڭ ۇجىمىمەن كەزدەستى
جۇزدەسۋ بارىسىندا ءابىلعازى قۇسايىنوۆ مەكەمە جۇمىسشىلارىن ءوز سايلاۋالدى تۇعىرناماسىنىڭ نەگىزگى باعىتتارىمەن تانىستىردى.
ءا. قۇسايىنوۆ اتاپ وتكەندەي، ەكولوگيالىق پروبلەمالار كۇردەلى ءارى وزەكتى بولىپ تابىلادى.
«ەكولوگيا - ادامزات تىرشىلىگىنىڭ ماڭىزدى فاكتورى. ءبىزدىڭ اينالامىزداعىنىڭ ءبارى - تابيعات، ءبىزدىڭ ءومىر ءسۇرىپ جاتقان ورتاق الەمىمىز. تەحنولوگيا ىلگەرى دامىعان سايىن، «جاسىل» ورتا وسالدانىپ بارادى.
تابيعات رەسۋرستارىن ماقساتتى ءارى جوسپارلى پايدالانۋ، قورشاعان ورتانى لاستانۋدان قورعاۋ، مەملەكەتتىك باقىلاۋدىڭ جوسپارلى جۇيەسىن ەنگىزۋ ەڭ باستى مىندەتىمىزگە اينالۋى ءتيىس» ، - دەپ اتاپ ءوتتى ءا. قۇسايىنوۆ.
كەزدەسۋ بارىسىندا كانديدات، سونداي- اق، الەم بويىنشا بىرەگەي تابيعي كەڭىستىكتەردىڭ كۇرت ازايىپ بارا جاتقانىن ءسوز ەتتى.
مىسالعا، جەر شارىنداعى حالقى كوپ ايماقتاردا جاھاندىق ەكوجۇيەنىڭ ماڭىزدى بولشەگى - باتپاقتى جەرلەردىڭ 90 پايىزى مۇلدە جويىلعان.
بۇگىندە، ءبىر ادامدى ازىق- تۇلىكپەن قامتاماسىز ەتۋگە قاجەتتى جەردىڭ كولەمى، الەم بويىنشا، 21,9 گەكتارعا تەڭ. ال جەر شارىنىڭ بيولوگيالىق مۇمكىندىگى 15,7 گەكتاردى عانا قۇرايدى. ياعني، وزدەرىڭىز بايقاعانداي، جەردى مەكەندەيتىن 7 ميلليارد ادامنىڭ اربىرەۋىن تازا، لاستانباعان، قۇنارلى جەرمەن قامتۋ ءۇشىن كەم دەگەندە 6,2 گەكتار جەتىسپەيدى. بۇل وتە كۇردەلى ماسەلە» ، - دەدى ءا. قۇسايىنوۆ.
كانديدات 19 - عاسىردىڭ سوڭىنان بەرى ءاربىر جاڭا ونجىلدىق الدىڭعىسىنا قاراعاندا جىلىنىپ بارا جاتقانىن ءمالىم ەتتى. 20 - عاسىردان بەرى ورتاشا اۋا تەمپەراتۋراسى 0,74 گرادۋسقا ءوستى. مۇنىڭ ۇشتەن ەكى بولىگى سوڭعى وتىز جىلعا تيەسىلى. تۇراقتى تەمپەراتۋرالىق كورسەتكىش عاسىرلار بويى ساقتالىپ كەلگەن تابيعات ءۇشىن بۇل ۇلكەن وزگەرىس»، - دەدى ءابىلعازى قۇسايىنوۆ.
«كوپتەگەن ەلدەردە جاسىل تەحنولوگيا وندىرىسكە ەنگىزىلمەي كەلەدى، ءتىپتى، ونى جاتىرقاپ وتىرعاندار قانشاما. تابيعي رەسۋرستار كەشەنىن بىرىكتىرەتىن ورتاق تەرمين - ەكولوگيانى كۇيزەلىسكە ۇشىراتقان مۇنداي كۇردەلى جاعداي امالسىز ەرتەڭگى كۇنىڭ تۋرالى الاڭداتادى.
ەكولوگيا - ءبىزدىڭ ورتاق ءۇيىمىز، عالامشارىمىز تۋرالى عىلىم. عالامشارىمىز جالعىز، سوندىقتان ونى كوزىمىزدىڭ قاراشىعىنداي ساقتاۋىمىز كەرەك»، - دەيدى كانديدات.
ءوز سوزىندە ءا. قۇسايىنوۆ ءاربىر ازاماتتى ەكولوگيا ماسەلەسىنە بەلسەنە ارالاسۋعا شاقىردى. ەكولوگيالىق تەپە- تەڭدىكتى ساقتاۋ جانە ونەركاسىپتىك قاۋىپسىزدىكتى ۇستانۋ يدەياسىن ناسيحاتتاۋدا ازاماتتىق قوعام وكىلدەرىنىڭ ءرولى وراسان. قوعامدىق ۇيىمدار بۇل جۇمىسقا بىلەك سىبانىپ كىرىسۋى كەرەك.
ەكولوگيا مەن تابيعاتتى قورعاۋ ماسەلەسىندە ازاماتتىق بەلسەندىلىكتى دامىتۋ قاجەت.
ادامدار سانالى تۇردە ەكولوگيالىق تەپە- تەڭدىكتى ساقتاپ، تابيعاتتىڭ شىنايى كەلبەتىن ساقتاۋ قاجەتتىلىگىن سەزىنۋلەرى كەرەك.