سايلاۋ-2015: كانديدات ءا. قۇسايىنوۆ پەتروپاۆلدا «قىزىلجار سۋ» ۇجىمىمەن كەزدەستى
سەرىكتەستىك جۇمىسشىلارىمەن كەزدەسۋ بارىسىندا ءابىلعازى قۇسايىنوۆ ەكولوگيالىق ماسەلەلەردى قامتىعان ءوزىنىڭ سايلاۋ الدى تۇعىرناماسىنىڭ نەگىزگى باعىتتارىمەن تانىستىردى.
ءا. قۇسايىنوۆ جيىنعا قاتىسۋشىلارعا جاھاندىق ەكولوگيالىق قىزمەتتىڭ نەگىزگى ۆەكتورلارى تۋرالى بايانداپ، تابيعاتتى قورعاۋ ماسەلەسىندە عىلىمنىڭ ماڭىزىنا ەرەكشە توقتالدى. بۇل - ەكولوگيالىق قاۋىپسىزدىك، كليمات پەن سۋ رەسۋرستارىن، «جاسىل» تەحنولوگيانى زەرتتەۋ جۇمىستارىن قوسا العاندا، ءبىرتالاي مىندەتتەر كەشەنىن قامتيتىن ماڭىزدى ماقسات.
كانديداتتىڭ ايتۋىنشا، الەمدە كۇنى بۇگىنگە دەيىن ەكولوگيالىق پروبلەمالارعا ءتيىستى نازار بولىنبەي كەلەدى. حالىقارالىق قاۋىمداستىقتار مەن مامانداندىرىلعان ۇيىمداردىڭ اتقارىپ جاتقان ەكولوگيالىق جۇمىستارى كونفەرەنسيا، تالقىلاۋلار، شەشىمى جوق داۋلارمەن عانا شەكتەلىپ وتىر.
ال الەمدە تابيعات قويناۋىن ءتيىمسىز پايدالانۋ، گەندىك قور مەن بيولوگيالىق ءار تۇرلىلىكتىڭ ازايۋى توپىراقتىڭ قۇنارسىزدانىپ، سۋدىڭ لاستانۋىنا، جالپى، قورشاعان ورتانىڭ قۇلدىراۋىنا الىپ كەلۋدە.
سونداي- اق، كانديدات الەمدىك ونەركاسىپتىڭ قارقىنىمەن ارتىپ وتىرعان تەحنوگەندىك اپاتتاردىڭ الدىن الۋ ماسەلەسىنە ارنايى توقتالىپ ءوتتى.
ءا. قۇسايىنوۆ اتاپ وتكەندەي، جەر جۇزىندە ادام پايدا بولىپ، ونىڭ وركەنيەتى وسكەن سايىن، بيوسفەرا ەۆوليۋتسياسىندا جاڭا - انتروپوگەندىك فاكتور ىسكە قوسىلدى. ادام بيوسفەرانى جەكە قاجەتتىلىكتەرىن قاناعاتتاندىرۋ ءۇشىن پايدالانا باستادى.
الايدا، قورشاعان ورتانى قانشالىقتى وزگەرتۋگە تىرىسقانىمىزبەن، جەر بەتىندەگى تىرشىلىك تابيعاتتىڭ قاتاڭ زاڭىنا باعىنىپ داميدى. سوندىقتان ادامزات وركەنيەتى تۇراقتى دامۋ ءۇشىن وسى زاڭدار مەن قاعيدالاردان اۋىتقىماۋى كەرەك.
«تابيعاتپەن ۇيلەسىمدى ءومىر ءسۇرۋ - ادامنىڭ جەر بەتىندەگى ءومىر سالتىنىڭ نەگىزگى قاعيداسى» ، - دەپ اتاپ ءوتتى ءابىلعازى قۇسايىنوۆ.
ونىڭ ايتۋىنشا، عىلىم، تەحنيكا مەن تەحنولوگيانىڭ ساپالى جاڭا بايلانىسىن قالىپتاستىرعان ⅩⅩ عاسىر قوعامنىڭ تابيعاتقا اسەر ەتۋ كۇشىن ارتتىرىپ، ادامزاتقا ءبىرقاتار وزەكتى ءارى وتكىر مىندەتتەر جۇكتەدى.
سول سەبەپتى، ءا. قۇسايىنوۆتىڭ پىكىرىنشە، تابيعات قويناۋىن ءتيىمدى ءارى جوسپارلى پايدالانۋ، قورشاعان ورتانى لاستانۋدان قورعاۋ، مەملەكەتتىك باقىلاۋدىڭ جوسپارلى جۇيەسىن ەنگىزۋ ءار ازاماتتىڭ باستى مىندەتىنە اينالۋى ءتيىس.
ءا. قۇسايىنوۆتىڭ سايلاۋالدى تۇعىرناماسىنىڭ تاعى ءبىر ماڭىزدى باعىتى - ونەركاسىپتىك قاۋىپسىزدىك ماسەلەلەرى.
كانديداتتىڭ ايتۋىنشا، ونەركاسىپتىك قاۋىپسىزدىك دەگەنىمىز - ءونىم مەن ءوندىرىستىڭ قاۋىپسىزدىگى، كوپ دەڭگەيلى ستاندارتتاۋ مەن سەرتيفيكاتسيالاۋ تۋرالى تەحنيكالىق رەگلامەنتتەردى، نورمالاردى قاتاڭ ۇستانۋ.
«مەنىڭ ماقساتىم - وسى نورمالاردىڭ اشىق جانە دۇرىس ورىندالۋىنا قول جەتكىزۋ.
قاۋىپتى وندىرىسپەن اينالىساتىن بارلىق ۇيىمدار ءوز جۇمىسشىلارىنىڭ، نىساندارى مەن قورشاعان ورتانىڭ قاۋىپسىزدىگىنە جاۋاپتى بولۋ كەرەك.
بارلىق كاسىپورىندار ءوز جۇمىستارىن قورشاعان ورتاعا ىقپالى مەيىلىنشە از بولاتىنداي ەتىپ جۇرگىزۋلەرى كەرەك»، - دەپ قورىتتى ءابىلعازى قۇسايىنوۆ.
سونىمەن قاتار « قىزىلجار سۋ» بىرلەستىگىنىڭ جۇمىسشىلارى الدىندا رەسپۋبليكالىق شتاب جەتەكشىسى رۇستەم جولامان ءسوز سويلەدى.
ر. جولامان ەكولوگيالىق تۇيتكىلدەردىڭ ماڭىزدىلىعىنا توقتالىپ، ونى دەر كەزىندە شەشۋ قاجەتتىگىن اتاپ ءوتتى.