سايلاۋ-2015: كوكشەتاۋدا ت. سىزدىقوۆ ستۋدەنتتەر مەن «كوكشەتاۋ مينەرالدى سۋلارى» ج ش س جۇمىسشىلارىمەن كەزدەستى

استانا. قازاقپارات - بۇگىن قازاقستان كوممۋنيستىك حالىق پارتياسى اتىنان ق ر پرەزيدەنتتىگىنە كانديدات تۇرعىن سىزدىقوۆ ۇگىت-ناسيحات ناۋقانى اياسىندا كوكشەتاۋ قالاسىندا ءبىرقاتار كەزدەسۋ وتكىزدى، دەپ حابارلادى ق ك ح پ و ك باسپا ءسوز قىزمەتىنەن.

العاشقى كەزدەسۋ «كوكشە» اكادەمياسىندا ءوتىپ، كانديدات ستۋدەنت قاۋىممەن كەزدەستى. كەزدەسۋگە ق ك ح پ اقمولا وبلىستىق كوميتەتىنىڭ ءبىرىنشى حاتشىسى ب. ءماجيتوۆ مودەراتورلىق ەتتى. ت. سىزدىقوۆ ءوز سوزىندە جاستارعا باتىستىق مادەنيەتتىڭ كولەڭكەلى ىقپالى تۋرالى ايتىپ بەردى.

«گولليۆۋدتىك فيلمدەر مەن باتىستىق كومپيۋتەرلىك ويىندار زورلىق-زومبىلىققا تولى. باتىستىق مودا كۇندەلىكتى كيىپ جۇرگەن كيىمدەردىڭ ەلىكتەر ۇلگىسى بولۋدان قالدى. بۇگىندە باتىستىق مادەنيەتتىڭ نەگىزىندە نە جاتىر - زورلىق-زومبىلىق پەن وڭشەڭ ادامگەرشىلىككە جات قىلىقتار، ءوزىن-ءوزى جەتىلدىرۋگە، دامىتۋعا دەگەن قۇلشىنىس جوق. باتىستىق تاماقتانۋ جۇيەسى، فاست-فۋد تۇتىنۋ ادامداردىڭ دەنساۋلىعىن قاۋىپكە تىگىپ وتىر.

بۇل جۇيە از شىعىنمەن مول تابىس تابۋدى عانا ماقسات تۇتادى.

زياندى ازىق-تۇلىكتى تۇتىنۋدىڭ سالدارىنان ءتۇرلى اۋرۋ-سىرقاۋلار ءورشىپ وتىر.

دۇرىس تاماقتانباۋ جانە سالاۋاتتى ءومىر سالتىن ۇستانباۋدىڭ كەسىرىنەن سەمىزدىككە، اقىل-ەستىڭ اۋىتقۋى سىندى ءتۇرلى دەرتتەرگە شالدىققان ەلدەر رەيتينگىندە باتىس مەملەكەتتەرى الدا كەلەدى»، - دەپ اتاپ ءوتتى ت. سىزدىقوۆ.

سونداي-اق، ت. سىزدىقوۆ ساپارى بارىسىندا «كوكشەتاۋ مينەرالدى سۋلارى» ج ش س جۇمىسشىلارىمەن كەزدەستى.

ءىس-شارانى ق ك ح پ اقمولا وبلىستىق كوميتەتىنىڭ ءبىرىنشى حاتشىسى ب. ءماجيتوۆ اشتى.

«بارلىق كومپيۋتەر ويىندارىندا بالالاردىڭ ساناسىنا تەرەڭ بويلاپ، اگرەسسيا تۋدىراتىن ۆيرۋستار بار. باتىستان ەسكەن زورلىق-زومبىلىققا نەگىزدەلگەن ناسيحات ادامدى اقىل-ەستەن، پاراساتتان ايىرادى.

شەتەلدىك كيىم-كەشەك، مۋزىكا، فيلمدەر مەن سەريالدار جاستاردى «دۇعالاپ» قويعانداي. باتىستىق ءومىر ءسۇرۋ سالتىنىڭ كەسىرىنەن بالا تۋۋ دەڭگەيى تومەندەپ، جاستار جاۋاپكەرشىلىكتەن قاشۋدا.

ءتىپتى، باتىستاعى مۋلتفيلمدەردىڭ كەيىپكەرلەرى ءبىر-ءبىرىن بالاعاتتاپ، قىرىپ-جويىپ جاتادى. مۇنىڭ ءبارى جوعارىدا اتاپ وتكەن كۇردەلى ماسەلەلەردىڭ بىردەن-ءبىر سەبەبىنە اينالدى. ءدال وسىنداي باتىستىق ونىمدەر بالالارىمىزدى قاتىگەزدىككە، ارسىزدىققا تاربيەلەۋدە.

گولليۆۋدتىك ستاندارتتاردىڭ ءبارى تەك تابىس تابۋعا نەگىزدەلگەن.

سونىڭ سالدارىنان باتىستا ادامدار ءبىر-بىرىمەن ارالاسۋدان قالدى»، - دەدى ت. سىزدىقوۆ.