الداعى 2015-2017-جىلدارى ارالىعىندا جىلۋ، سۋمەن جابدىقتاۋ جانە سۋ بۇرۋ سالاسىندا 10 جوبا جۇزەگە اسىرىلادى
بۇل تۋرالى بۇگىن استانادا ق ر پرەزيدەنتى نۇرسۇلتان نازاربايەۆتىڭ قاتىسۋىمەن ءوتىپ جاتقان ەلىمىزدىڭ «نۇرلى جول» جانە يندۋستريالدى-يننوۆاتسيالىق مەملەكەتتىك باعدارلامالارىنىڭ ىسكە اسىرىلۋ بارىسىنا ارنالعان جالپى ۇلتتىق تەلەكوپىر بارىسىندا ق ر ۇلتتىق ەكونوميكا ءمينيسترى ەربولات دوسايەۆ ءمالىم ەتتى.
ءمينيستردىڭ ايتۋىنشا، جىلۋ، سۋ، سۋ بۇرۋ، جەلىلەرىنىڭ توزۋىن تۇبەگەيلى تومەندەتۋ ماقساتىندا ۇلتتىق قوردان 2015-جىلى 60 ميلليارد 2016-جىلى 90 ميلليارد تەڭگە قاراستىرىلعان. اعىمداعى جىلدىڭ وزىندە اتالعان باعىت بويىنشا وڭىرلەردە 96 الەۋمەتتىك ماعىزى بار جوبا جۇزەگە اسىرىلۋدا.
«تەك اعىمداعى جىلدىڭ وزىندە 266,3 شاقىرىم جىلۋ، سۋمەن جابدىقتاۋ جانە سۋ بۇرۋ جەلىسى مەن 14 قازاندىق جاڭعىرتىلاتىن بولادى. بۇل جەلىلەردىڭ توزۋىن 2015-جىلى 67 تەن 65 پايىزعا تومەندەتۋگە مۇمكىندىك بەرەدى جانە 2,5 مىڭنان استام تۇرعىن ۇيدە تۇرىپ جاتقان حالىق ءۇشىن كورسەتىلەتىن قىزمەتتەردىڭ سەنىمدىلىگى مەن ساپاسىن ايتارلىقتاي ارتتىرادى»، - دەدى مينيستر.
ە. دوسايەۆتىڭ سوزىنە قاراعاندا، ەۋرازيالىق دامۋ جانە قايتا جاڭعىرتۋ بانكىمەن قىزىلوردا، اقتوبە، شىمكەنت قالالارىندا كوممۋنالدىق ينفراقۇرىلىمداردى جاڭعىرتۋعا 95 ميلليون دوللاردىڭ كەلىسىمىنە قول قويىلعان.
«سونىمەن قاتار 2015-جىلى پەتروپاۆل، سەمەي جانە تاراز قالالارى بويىنشا سوماسى 131 ميلليون دوللاردان اساتىن جوبالاردى جۇزەگە اسىرۋ كەلىسىمىنە قول قويىلاتىن بولادى. 2015-2017-جىلدارى ارالىعىندا جىلۋ، سۋمەن جابدىقتاۋ جانە سۋ بۇرۋ سالاسىندا جالپى قۇنى 464 ميلليون دوللاردى قۇرايتىن 10 جوبا شاعىن قارجى ۇيىمدارىمەن جۇزەگە اسىرىلادى»، - دەدى ول.
اۆتور: مارلان جيەمباي