ءماجىلىس 2014 - جىلعى رەسپۋبليكالىق بيۋدجەتتىڭ ناقتىلانعان جوباسىن ماقۇلدادى

 استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «2014-2016 - جىلدارعا ارنالعان رەسپۋبليكالىق بيۋدجەت تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماقۇلدادى.

ۇلتتىق ەكونوميكا ءمينيسترى ەربولات دوسايەۆتىڭ ايتۋىنشا، ەلدەگى ەكونوميكالىق جاعدايدى تالداۋ بازاسىندا ماكرو ەكونوميكالىق كورسەتكىشتەردىڭ پارامەترلەرىن ناقتىلاۋ، سونىمەن قاتار، بيۋدجەتكە تۇسىمدەردىڭ بولجامىنا وراي بيۋدجەتكە تۇزەتۋ ەنگىزىلىپ وتىر.

بۇل رەتتە قۇجاتقا سايكەس، 2014 - جىلعا ارنالعان رەسپۋبليكالىق بيۋدجەت كىرىستەرىنىڭ ناقتىلانعان بولجامى (ترانسفەرتتەر ءتۇسىمىن ەسەپكە الماعاندا) بەكىتىلگەن جوسپارعا 420 ميلليارد  742 ميلليون 279 مىڭ تەڭگەگە ازايتىلا وتىرىپ، 3 ترليون 940, 4 ميلليارد تەڭگە سوماسىندا ايقىندالادى. سونىڭ ىشىندە سالىقتىق تۇسىمدەر بويىنشا كىرىستەر - 460 ميلليارد 511 ميلليون, سالىقتىق ەمەس تۇسىمدەر - 39 ميلليارد 501 ميلليون تەڭگەنى قۇرايتىن بولادى.  

ال بيۋدجەت شىعىستارى 65 ميلليارد 520 ميلليون تەڭگەگە ۇلعايا وتىرىپ، 7 ترليون 190 ميلليارد 297 ميلليون تەڭگەنى قۇرايتىن بولادى. بۇل رەتتە ۇلتتىق قوردان 325 ميلليارد تەڭگە نىسانالى ترانسفەرتتەر بولىنەدى. اتالعان قاراجات نەگىزىنەن بانك سەكتورىن ساۋىقتىرۋعا، يندۋستريالاندىرۋ جوبالارىن ساۋىقتىرۋعا، استانا قالاسىندا ينفراقۇرىلىمدار سالۋعا جولداناتىن بولادى.

زاڭ جوباسىنا سايكەس، اعىمداعى جىلعى بيۋدجەتتىڭ تاپشىلىعى ءى ج ءو 2,6 پايىزىن قۇرايدى. ال ينفلياتسيا پارامەتەرلەرى بولجانعان 6-8 پايىزدىق دالىزدە ساقتالادى.

تالقىلاۋ بارىسىندا دەپۋتاتتار تاراپىنان بيۋدجەتتىڭ تيىمدىلىگىن ارتتىرۋ، قاراجاتتى يگەرۋدى تولىق قامتاماسىز ەتۋ ماسەلەلەرى كوتەرىلدى.

ءماجىلىس ماقۇلداعان زاڭ جوباسى پارلامەنت سەناتىنا جولدانادى.   

اۆتور:   قانات مامەتقازى ۇلى