ورتتەن زارداپ شەككەندەرگە «سامۇرىق-قازىنا» 200 ميلليون تەڭگە ءبولدى
14:56, 12 - ماۋسىم 2023
استانا. قازاقپارات - «سامۇرىق-قازىنا» اباي وبلىسىندا ورتتەن زارداپ شەككەندەرگە 200 ميلليون تەڭگە ءبولدى.
بۇل تۋرالى قور باسشىسى نۇرلان جاقىپوۆ مالىمدەدى، دەپ حابارلايدى قازاقپارات.
قاراجات ەۆاكۋاتسيالانعان ەلدى مەكەن تۇرعىندارىنا، سونداي-اق ءورتتى سوندىرۋگە تارتىلعان ماماندارعا گۋمانيتارلىق كومەك رەتىندە بەرىلەدى جانە Samruk-Kazyna Trust كورپوراتيۆتىك قايىرىمدىلىق قورى ارقىلى اۋدارىلادى.
«بۇكىل قازاقستان ورمان ءورتى ءورشىپ تۇرعان اباي وبلىسىنداعى وتانداستارىمىز ءۇشىن الاڭداۋلى. مەملەكەت باسشىسى ازاماتتارعا جان-جاقتى كومەك كورسەتۋدى تاپسىردى. ءبىز ۇلتتىق ءال-اۋقات قورى رەتىندە تاسادا قالا المايمىز»، - دەپ جازدى نۇرلان جاقىپوۆ Twitter- دەگى پاراقشاسىندا.