اقتوبەدە عۇن ءداۋىرىن زەرتتەۋگە 200 گە جۋىق ادام قاتىسادى
اقتوبە وبلىسىندا 2023-2025 -جىلدارعا ارنالعان جول كارتاسى قابىلداندى. سوعان سايكەس 14 جوبا ىسكە اسىرىلادى. جوسپار بويىنشا 12 ى ارحەولوگيالىق زەرتتەۋ جۇمىسى. ەتنوگراتسيالىق زەرتتەۋ دە جۇرگىزىلەدى. شەتەلتىك ارحيۆتەردە عۇن تايپالارىنا قاتىستى مالىمەت ىزدەيتىن توپ تا قۇرىلدى.
«ءا. مارعۇلان اتىنداعى ارحەولوگيا ينستيتۋتى، ش. ءۋاليحانوۆ اتىنداعى تاريح جانە ەتنولوگيا ينستيتۋتى جانە ق. جۇبانوۆ اتىنداعى وڭىرلىك ۋنيۆەرسيتەت پەن مۋزەي كۇش جۇمىلدىرادى. وڭىردە ماۋسىم ايىنىڭ 1 نەن باستاپ قازبا جۇمىستارى باستالادى. بارلىعى بەس ەكسپەديتسيا جۇرگىزىلەدى. سوڭعى ۋاقىتقا دەيىن ءبىزدىڭ وڭىردە عۇن داۋىرىنە قاتىستى دەرەك از بولدى. ءبىراق زەرتتەۋ جۇرگىزىلگەن جەردە ولجا مول. سوندىقتان كەشەندى زەرتتەۋ ماسەلەسى قوزعالدى. كۇشتى وسى باعىتقا سالامىز. بارلىعى التى اۋدان تەرريتورياسى قارالادى. ولار: ويىل، قوبدا، مۇعالجار، ايتەكە بي، ىرعىز جانە حرومتاۋ اۋداندارى. ناتيجەسىن 28-29 قىركۇيەكتە بولاتىن حالىقارالىق عىلىمي كونفەرەنتسيادا ايتامىز»، - دەدى اقتوبە وبلىستىق تاريحي- ولكەتانۋ مۋزەيىنىڭ ديرەكتورى مەيرام دۇيسەنعالي.
قازىرگى كەزدە اقتوبە وبلىسىنىڭ اۋماعىندا عۇن داۋىرىنە جاتاتىن 400 گە جۋىق ەسكەرتكىش بەلگىلەندى. بۇل تەك ءۇش اۋداندا انىقتالعان دەرەك.
«قوبدا اۋدانىنداعى ءداربىسالى قورىمى، ويىل اۋدانىنداعى اقبۇلاق قورىمى، ايتەكە بي اۋدانىندا اققيسىق قورىمى عۇن داۋىرىنە جاتادى. بۇدان بولەك مۇعالجار اۋدانىندا تولەۋبۇلاق كەشەنىندە سارمات ءداۋىرىنىڭ ەسكەرتكىشتەرى زەرتتەلەدى. وسى جۇمىستارعا اكادەميالىق ينستيتۋتتاردىڭ قىزمەتكەرلەرى جۇمىلدىرىلادى. جوبامەن 200 گە جۋىق ادام ءۇش اي جۇمىس ىستەپ، قورىتىندىلايمىز. دەرەكتى فيلم ءتۇسىرىلىپ، مونوگرافيالار جازىلادى. عىلىمي ماقالالار دا بولادى. شەتەلدىك زەرتحانالارعا شىعىپ، تالدامالار جۇرگىزەمىز»، - دەدى مەيرام دۇيسەنعالي.
ايتا كەتەيىك، 2017 -جىلى اقتوبەدە عۇن داۋىرىنە جاتاتىن باي جەرلەۋ كەزدەيسوق تابىلدى. بيىل سول كەزدە تابىلعان ات ابزەلدەرى مەن اشەكەيلەر تولىق قالپىنا كەلتىرىلەدى.