تالدىقورعان يزولياتورىندا تەرگەلىپ جاتقان 200 گە جۋىق ازامات داۋىس بەردى

تالدىقورعان. قازاقپارات - تالدىقورعاننىڭ تەرگەۋ يزولياتورىندا ەكى جۇزگە جۋىق تەرگەۋدەگىلەر داۋىس بەردى، دەپ حابارلايدى قازاقپارات ءتىلشىسى.

جەتىسۋ وبلىسىندا تەرگەۋدەگىلەر، سونداي-اق ۇكىم زاڭدى كۇشىنە ەنبەگەن ازاماتتار شەتتە قالماي، وزدەرىنىڭ سايلاۋ قۇقىعىن ىسكە اسىردى.

الماتى جانە جەتىسۋ وبلىستارى بويىنشا قاجد قاراستى 71№ تەرگەۋ يزولياتورىندا ورنالاسقان 1009№ سايلاۋ ۋچاسكەسىندە داۋىس بەرۋ تاڭعى 07.00 دەن باستالدى.

بۇعان دەيىن قاج قىزمەتكەرلەرى سايلاۋشىلارعا پرەزيدەنتتىككە كانديداتتارمەن تانىسۋ ءۇشىن اقپاراتتىق ماتەريالدار ۇسىنعان بولاتىن.

«داۋىس بەرۋ زاڭ مەن قۇقىقتىق نورمالاردىڭ تالاپتارىنا سايكەس ءوتتى. داۋىس بەرۋگە ارنالعان جاشىكتەر مەن كابينالار ورناتىلدى. بولمە بەينەباقىلاۋمەن جابدىقتالعان. زاڭبۇزۋشىلىقتار مەن ەسكەرتۋلەر بولعان جوق»، - دەدى سايلاۋ ۋچاسكەسىنىڭ ءتوراعاسى ماديار ۋميربايەۆ.