بۇل تەحنولوگيا سىرتتان قاراپايىم كورىنەدى. كەستەلەر، كومپيۋتەرلەر مەن سان ءتۇرلى سىم. الايدا مۇمكىندىگى وتە زور، تىم سەزىمتال. 200 مەتر قاشىقتىقتاعى ادامنىڭ سىبىرىن دا ەستي الادى.
بار- يلان ۋنيۆەرسيتەتىننىڭ وپتو- ەلەكترونيكا زەرتحاناسى ماماندارىنىڭ بۇل جەتىستىگى، تىڭ تىڭداۋ قۇرىلىعىسىنىڭ شارىقتاۋ شەگى ىسپەتتى. لازەر ساۋلەسى ءسال عانا تەربەلىستەردى تىركەپ، ارنايى باعدارلاما ونى ءاپ ساتتە سوزگە اۋدارادى. سينتەزاتور سياقتى، ءبىراق جاساندى دىبىس ەمەس، ناعىز ادام داۋىسىن شىعارادى. ازىرگە ساپاسى سونشا مىقتى ەمەس. ءبىراق بولاشاقتا بۇل ماسەلەنىڭ دە شەشىمىن تابامىز، - دەيدى عالىمدار.
زەيەۆ زالەسكي، زەرتحانا جەتەكشىسى:
- ءبىزدىڭ سويلەۋىمىز، بۇل تەربەلىستەر جيناعى. ءسوز ايتقاندا كوكىرەك قۋىسىمىز جيىلىپ، كيىمىمىز دە، اينالامىزداعى زاتتار دا تەربەلەدى. ەڭ باستىسى وسى. ەندى تەك تەحنيكالىق جۇمىس قالدى. وسى تەربەلىستەردى جازىپ العاننان كەيىن ونى قالاي اجىراتۋعا بولادى. سونى زەرتتەيمىز. بار گاپ وسىندا.
قازىر الەم عالىمدارى وسىنىڭ قۇپياسىن اشا الماي باس قاتىرىپ جاتىر. ونداعان زەرتحانا جۇمىس ىستەپ، جۇزدەگەن ميلليون دوللار جۇمسالعان. الايدا بۇعان دەيىن جاسالعان قۇرىلعىلار تىم ۇلكەن ءارى قۇرىلىمى كۇردەلى. ونىڭ ۇستىنە قۇرىلعى سويلەگەن اداممەن قاتار ءبىر سىزىقتىڭ بويىندا تۇرۋى كەرەك. ال بار- يلان ۋنيۆەرسيتەتىنىڭ وقىمىستىلارى ويلاپ تاپقان قۇرىلعىنىڭ ءجونى بولەك. «سپەكل» دەپ اتالاتىن ونەرتابىس بولماشى تەربەلىستىڭ ءوزىن تىركەپ، سوزگە اۋدارادى. ءتىپتى قالتارىستا تۇرىپ تا تىڭ تىڭداۋعا بولادى.
مارك نوۆيتسكي، جوبا جاساۋشى:
- ادام سويلەگەندە قاسىندا تۇرعان قاعاز، ىدىس نەمەسە كارتون قورابى دا تەربەلەدى. مۇنى تەكسەردىك. ءبىز دە ادامداردى تىڭداي الامىز، ءبىراق ونشا الىس بولماۋى كەرەك. ەندىگى مىندەت - جاڭا قۇرىلعىنى كىشىرەيتۋ.
ماماندار ونى ۇيالى تەلەفوننىڭ كولەمىندەي ەتپەكشى. ياعني بولاشاقتا بۇل ونەرتابىس پوليتسيا مەن ارنايى قىزمەت وكىلدەرى قولدانا الداتىنداي بولۋى كەرەك. وعان قوسا بۇل قۇرىلعىنىڭ كومەگىمەن قاس قاعىم ساتتە جۇرەك قاعىسى مەن قان قىسىمىن دا ولشەۋگە بولادى. ءتىپتى قازىرگى مەديتسينانىڭ مۇمكىندىگى جەتپەي وتىرعان كوز اۋرۋلارىن دا الدىن الا انىقتاي الادى ەكەن.
www.24.kz