قازاقستاننىڭ كوروناۆيرۋسقا قارسى ەكپەسى كەلەشەگى زور 200 ۆاكسينا قاتارىندا
The Washington Post-تا جاريالانعان ساراپتاماعا سايكەس، قازاقستان رەسپۋبليكاسى «بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى» ر م ك ازىرلەگەن كوروناۆيرۋس ينفەكسياسىنا قارسى ۆاكسينا كەلەشەكتە بۇكىل الەمدى جايلاعان ىندەتتى جەڭۋگە كومەك بەرە الاتىن ەكسپەريمەنتتىك 200 ۆاكسينا تىزىمىنە قوسىلعان.
The Washington Post قازاقستاندىق ۆاكسينانى ازىرلەۋگە ۇزاق ۋاقىت كەتەتىن ءالسىز جانە يناكتيۆتەلگەن ۆيرۋستىق ۆاكسينالار ساناتىنا قوسىپ وتىر. ءبىراق بۇل ۆاكسينانىڭ تيىمدىلىگىنە اسەر ەتەدى دەگەن ءسوز ەمەس.
«ءيا، ۆاكسينانىڭ بۇل ءتۇرىن ازىرلەۋ بارىسىندا بارىنشا ەسكىرگەن ءادىس قولدانىلادى. ول كەزدە ۆيرۋس السىرەيدى. سوندىقتان ول اۋرۋ تۋدىرمايدى. ءبىراق، اعزانىڭ يممۋندىق جۇيەسىندە قورعانىس تەتىگىن ىسكە قوسادى. قىزىلشاعا، ەپيدەميولوگيالىق پاروتيتتە جانە قىزامىققا قارسى ۆاكسينادا ءدال وسى ءادىس قولدانىلادى. يناكتيۆتەلگەن ۆيرۋستىق ۆاكسينادا ادامدارعا جۇعۋعا قابىلەتسىز، الايدا يممۋندىق جۇيەگە ينفەكسياعا قارسى قورعانىس رەاكسياسىن قالاي ۇيىمداستىرۋدى كورسەتە الاتىن ءولى ۆيرۋستار بولادى. بۇل ءادىستى امەريكالىق ۆيرۋسولوگ دجوناس سولك پوليوميەليتكە قارسى ۆاكسينا ازىرلەۋ بارىسىندا قولدانعان. اتاپ وتەرلىگى، سولك ۆاكسيناسىن قولدانعاننان كەيىن ا ق ش- تا بالالار اراسىنداعى پوليومەليتكە شالدىعۋ 96 پايىزعا تومەندەدى. سونىمەن قاتار بۇل ءادىس تۇماۋعا قارسى ۆاكسينانى ازىرلەۋ بارىسىندا دا قولدانىلادى»، - دەپ جازادى The Washington Post.
باسىلىمنىڭ اتاپ وتۋىنشە، قازىردىڭ وزىندە كوروناۆيرۋسقا قارسى 170-تەن استام ۆاكسينا زەرتحانالاردا جانۋارلارعا، 7 ۆاكسينا دەنى ساۋ جاس ادامدارعا، 12 ۆاكسينا تاۋەكەل توبىنا كىرەتىن ادامدارعا سالىنىپ، سىنقتان ءوتىپ جاتىر. مۇنان بولەك، تاعى 7 ۆاكسينا تيىمدىلىگى مەن قاۋىپسىزدىگىن انىقتاۋ ءۇشىن 1 مىڭ ادامعا سالىنعان. وكىنىشكە قاراي، ازىرشە ءبىر دە ءبىر ۆاكسينا تولىققاندى قولدانۋ ءۇشىن ماقۇلدانعان جوق.
ەستەرىڭىزگە سالا كەتسەك، 2020 -جىلدىڭ 26 - شىلدەسىندە قازاقستاندىق ۆاكسينانىڭ 5 ازىرلەۋشىسى ءتىرى ۆيرۋسپەن جۇمىس ىستەۋ بارىسىندا قاۋىپسىزدىگىن قامتاماسىز ەتۋ ءۇشىن ەرىكتى تۇردە ۆاكسينانى وزدەرىنە سىنادى. ق ر دەنساۋلىق ساقتاۋ مينيسترلىگىنەن رۇقسات الىنعاننان كەيىن 2020 -جىلدىڭ 20 - قىركۇيەگىندە الماتى قالاسىنداعى كلينيكانىڭ بازاسىندا COVID-19-عا انتيدەنەسى جوق 44 ەرىكتىگە كلينيكالىق سىناق (1 فازا) باستالۋى ءتيىس. 2020 -جىلدىڭ قازان ايىنىڭ ورتاسىندا دۇنيەجۇزىلىك دەنساۋلىق ساقتاۋ ۇيىمىنىڭ تالاپتارىنا ساي كەلەتىن 200 ەرىكتىگە كلينيكالىق سىناق وتكىزۋدىڭ Ⅱفازاسىنا شىعۋ جوسپارلانعان. كلينيكالىق سىناقتىڭ Ⅱ فازاسى 2020 -جىلدىڭ جەلتوقسان ايىندا اياقتالماق.
ايتا كەتكەن ءجون، بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتى ازىرلەگەن Covid-19 قارسى ەكىنشى ۆاكسينا دۇنيەجۇزىلىك دەنساۋلىق ساقتاۋ ۇيىمىنىڭ سايتىنا تىركەلگەن بولاتىن. COVID-19 ۆاكسيناسىن جاساۋ بويىنشا جۇمىستاردىڭ بارىسىنا قىزىعۋشىلىق تانىتقان ازاماتتار ددسۇ ۆەب- سايتىندا ۆاكسيناعا ۇمىتكەرلەر تۋرالى جالپى شولۋدى وقي الادى.
الدىن الا بولجامعا سايكەس، قازاقستاندا كوروناۆيرۋسقا قارسى ۆاكسينا 65 جاستان اسقان، جۇرەك- قان تامىرى اۋرۋى، قانت ديابەتى جانە سوزىلمالى وكپە اۋرۋلارى بار تاۋەكەل توبىنا كىرەتىن ادامدارعا جانە مەديتسينا قىزمەتكەرلەرىنە سالىنادى. ۆاكسينا الاتىنداردىڭ بولجامدى سانى - 2347000 ادام.
اۆتور: مارلان جيەمباي