باسىلىمنىڭ حابارلاۋىنشا، ۆيكتوريا شتاتىنداعى شىعىس گيپپسلەندتە كەم دەگەندە 43 ءۇي ورتەنسە، جاڭا وڭتۇستىك ۋەلستە ورتەنگە ۇيلەردىڭ سانى 200 دەن اسادى.
«سەيسەنبى كۇنى ەۆاكۋاتسيا جاساي الماعان، قالاداعى ۇيلەرى ورتكە ورانعان مىڭداعان تۇرعىن جاعالاۋعا قاشقان ەدى. جاعداي ازداپ جاقسارىپ، باس جول بىرنەشە جولعا اشىلعاندا حالىقتىڭ شىعۋىنا مۇمكىندىك پايدا بولدى. دەگەنمەن، جاڭا جىلدىڭ العاشقى ساعاتتارىندا جاڭا وڭتۇستىك ۋەلستە 112 ءۇي ورتەنىپ جاتتى»، دەپ جازادى bbc.
جاڭا وڭتۇستىك ۋەلستىڭ پرەمەر-ءمينيسترى گلەديس بەرەجيكليان توتەنشە جاعداي قىزمەتى جولداردى تازارتىپ، ەلەكتر ەنەرگياسىن قالپىناكەلتىرۋ ءۇشىن جۇمىسشىلار اۋا رايىنىڭ قولايلى بولعانىن كۇتەتىنىن ايتتى. سونىمەن قاتار سەنبى كۇنى اۋا تەمپەراتۋراسى كوتەرىلەتىنىن ەسكەرتتى.
ءورت سالدارىنان كەمىندە ءۇش ادام قازا تاپتى. ولاردىڭ ەكەۋى، 63 جاستاعى اكەسى مەن 29 جاستاعى ۇلى ورتتەن ءۇيى مەن قۇرىلعىلارىن قۇتقارماق بولىپ قازا تاپسا، تاعى ءبىر ادامنىڭ دەنەسى كولىك ىشىنەن تابىلعان. وسىلايشا وسى كەزەڭدە ورتتەن قازا تاپقان ادامدار سانى 13 كە جەتتى.
اۆستراليا ۇكىمەتى جاڭا ۋەلس پەن ۆيكتورياداعى ءورتتى سوندىرۋگە كومەكتەسۋ ءۇشىن قوسىمشا ۇشاق، تىكۇشاق پەن قايىق جىبەرىلەتىنىن مالىمدەدى. ولار جىبەرگەن كومەك ءورت ورنىنا جۇما كۇنى جەتۋى ءتيىس.