بۇل تۋرالى «كاسىپكەرلىك سالاسىنداعى پروكۋراتۋرا قاداعالاۋى» اتتى بيزنەستى قورعاۋ جونىندەنى 3- فورۋمدا ق ر باس پروكۋرورىنىڭ ورىنباسارى مارات احمەتجانوۆ ءمالىم ەتتى، دەپ حابارلايدى قازاقپارات.
«پرەزيدەنت قازانداعى جولداۋىندا باسەكەلەستىكتى دامىتۋ مەن تاريفتەردى رەتكە كەلتىرۋ بويىنشا باتىل شەشىمدەر قابىلداۋ قاجەتتىگىن اتاپ ءوتتى. ەلىمىز بويىنشا پروكۋراتۋرا ەنەرگەتيكالىق كاسىپورىنداردى تەكسەردى. ءبىزدىڭ شارالار اياسىندا 15 وڭىردە ەلەكتر ەنەرگياسى مەن جىلۋمەن قامتاماسىز ەتۋگە ءتاريفى دەڭگەيى تومەندەتىلدى. تۇتىنۋشىلارعا 15 ميلليارد تەڭگەدەن استام سوما وتەلدى» ، - دەدى م. احمەتجانوۆ.
ونىڭ ايتۋىنشا، مونوپوليستەر ارەكەتىنەن بيزەسمەندەر دە زارداپ شەكتى. «ماسەلەن، اتىراۋ وبلىسىندا «اتىراۋەنەرگوساتۋ» جشس بويىنشا 120 ميلليون تەڭگەگە ءتاريفتىڭ اسىرا كورسەتىلۋى انىقتالدى. تولەمدەر مولشەرى تومەندەتىلىپ، بەس مىڭ كاسىپكەردىڭ قۇقىقىعى قورعالدى» ، - دەدى ول.
م. احمەتجانوۆتىڭ سوزىنە قاراعاندا، جالپى ەلىمىز بويىنشا 200 مىڭنان استام كاسىپكەر شىعىندارىنىڭ ازايعانىن سەزىنگەن.
«وسىنداي زاڭ بۇزۋشىلىقتار وكىلەتتى ورگانداردىڭ ارەكەتسىزدىگىنەن ورىن الدى. لاۋازىمدى تۇلعالارعا قاتىستى جەتى قىلمىستىق ءىس قوزعالىپ، پروكۋرورلىق ارەكەت ەتۋ شارالارىمەن 27 ادام جازاعا تارتىلدى» ، - دەدى ول.
اۆتور:رۋسلان عابباسوۆ