سانكت-پەتەربۋرگتە قۇرمانعازى ساعىرباي ۇلىنىڭ 200 جىلدىعى اتالىپ ءوتىلدى
رەسەيدىڭ مادەني استاناسىندا وتكەن سالتاناتتى شارانى جەرگىلىكتى قازاقتاردىڭ «اتامەكەن» ۇيىمى مەن قازاقستاننىڭ سانكت-پەتەربۋرگتەگى باس كونسۋلدىعى بىرلەسىپ وتكىزدى. شاراعا اتىراۋ وبلىسىنىڭ ارتىستەرى دە ارنايى بارىپ، ونەر كورسەتتى.
پەتەربور قازاقتارى ءۇشىن بيىل قوس قۋانىش قاتار كەلدى. جەرگىلىكتى قانداستارىمىز ءاز- ناۋرىزبەن بىرگە كۇيشى قۇرمانعازى ساعىرباي ۇلىنىڭ 200 -جىلدىق مەرەيتويىن بىرگە اتاپ ءوتتى. سالتاناتتى كەش سانكت- پەتەربۋرگتەگى «رەسەي - مەنىڭ تاريحىم» اتتى ەڭ جاڭا، ەڭ ۇلكەن مۇراجاي كەشەنىندە ۇيىمداستىرىلدى. ۇلكەن زال ۇلتتىق ونەرگە سۋسىنداعان كورەرمەنگە لىق تولدى.
ناۋرىز - جىل باسى، بەرەكە باستاۋى. بۇل مەرەكەنى پەتەربۋرگتەگى قازاقتار 92- جىلدان بەرى ۇزبەي تويلاپ كەلەدى. ونداعى ماقسات - جات جۇرتتا جۇرگەن وسكەلەڭ ۇرپاقتى ۇلتتىق تامىرىنان اجىراتپاي، سالت-ءداستۇردى جاستايىنان ساناعا سىڭىرە بەرۋ.
- وسىندا جۇرگەندىكتەن ءوز ءتىلىمىزدى، مادەنيەتىمىزدى ماداقتاعىمىز كەلەدى. سوندىقتان، ناۋرىزبەن قوسا قۇرمانعازىنىڭ 200 جىلدىعىن اتاپ ءوتىپ جاتىرمىز»، - دەيدى سانكت-پەتەربۋرگتەگى «اتامەكەن» قوعامدىق ۇيىمىنىڭ پرەزيدەنتى سارسەنعالي قۇسپانوۆ.
پەتەربۋرگتەگى الۋان ۇلتتىڭ وكىلى ءوزارا تاتۋ تۇرادى. سوندىقتان، ءتۇرلى دياسپورا وكىلدەرى ءبىر- ءبىرىن قولداپ، كەز كەلگەن شارانى بىرلەسىپ وتكىزەدى. سول سەبەپتى، بۇل كەشكە جەرگىلىكتى قازاقتار مەن ستۋدەنتتەر عانا ەمەس، وزگە ۇلت وكىلدەرى دە مولىنان كەلدى.
لەنينگراد وبلىسىنداعى دوستىق ءۇيىنىڭ ديرەكتورى ۆلاديمير ميحايلەنكونىڭ ايتۋىنشا، رەسەيدىڭ قازاق ەلىمەن قارىم- قاتىناسى ەرەكشە. «سەبەبى، كەزىندە لەنينگراد قورشاۋدا بولعاندا، قالانى قورعايمىز دەپ قانشاما قازاقتىڭ جان تاپسىرعانىن بىلەمىز. سوندىقتان، ناۋرىز ءبىزدىڭ دە مەرەكەمىز. پەتەربۋرگتىڭ ورىسى دا، يەۆرەي مەن تاتارى دا بۇل كۇندى ءبىر كىسىدەي تويلايدى. سەبەبى، ناۋرىز ءبىزدىڭ جاقىنداستىرا تۇسەدى».
- وتە تاماشا، جاقسى ءوتتى. كوڭىلىمىزدەن شىقتى. وسىندا تۇراتىن كوپتەگەن حالىقتار، قازاق حالقى جينالدى. وتە ريزامىز. وسىنداي شارالار ءالى دە كوبىرەك بولىپ تۇرسا دەيمىز، - دەگەن تىلەگىن ءبىلدىردى سانكت-پەتەربۋرگ قالاسىنىڭ تۇرعىنى گۇلشات نيەتالينا.
بيىل كۇيشى- كومپوزيتور قۇرمانعازى ساعىرباي ۇلىنىڭ تۋعانىنا - 200 جىل. وسى مەرەيتويعا نۇرمۇحان ءجانتورين اتىنداعى اتىراۋ ولىستىق فيلارمونياسىنىڭ ارتىستەرى ارنايى كەلدى. ءداستۇرلى اندەردى ايتىپ، قۇرمانعازىنىڭ كوپكە تانىمال كۇيلەرىن ورىنداعان ونەر ۇجىمى جۇرتتىڭ ىقىلاسىنا بولەندى.
اتىراۋ وبلىستىق مادەنيەت، مۇراعات جانە قۇجاتتاما باسقارماسىنىڭ باسشىسى سالامات ساعىمپاز ۇلىنىڭ پىكىرىنشە، «قۇرمانعازىنىڭ شىعارمالارى تەك قانا ۇلى دالامىزدا، ماڭگىلىك ەلىمىزدە عانا ەمەس، بۇكىل الەمدە ءوزىنىڭ ورنى بولاتىنىنا ەشقانداي كۇمان بولماۋى ءتيىس».
اتامەكەننەن الىستا جۇرسە دە اۋىزبىرلىكتەن اجىراماعان اعايىن، ۇلتىمىزدىڭ ۇلى تۇلعالارىن ۇنەمى ۇلىقتاپ جۇرەدى. ماسەلەن، بۇعان دەيىنگى جىلدارى سانكت-پەتەربۋرگتە جامبىل جابايەۆ پەن مۇحتار اۋەزوۆتىڭ مەرەيتويلارى وتكەن. بارشا قازاققا قاستەرلى مەيرام - تاۋەلسىزدىك كۇنىنىڭ دە ەسكەرۋسىز قالعان كەزى جوق.