بيىل قىتاي-ەۋروپا-قىتاي باعىتىنداعى ترانزيت 200 مىڭ كونتەينەرگە جەتەدى
بۇل تۋرالى بۇگىن ەلوردادا وتكەن باسپا ءسوز ءماسليحاتىندا «قازاقستان تەمىر جولى» ۇ ك» ا ق- نىڭ لوگيستيكا جونىندەگى ۆيتسە-پرەزيدەنتى سانجار ەلۋبايەۆ ايتتى، دەپ حابارلايدى قازاقپارات.
«قازاقستان تەمىر جولى» ۇ ك» ا ق ترانسفورماتسيا باعدارلاماسى اياسىندا ترانزيتتىك الەۋەتىن دامىتۋ ماقساتىندا كوممەرتسيالىق قىزمەتتىڭ تيىمدىلىگىن، كورسەتىلەتىن قىزمەتتەر مەن پروتسەستەر ساپاسىن ارتتىرۋ جۇمىسىن قولعا الدى. قازىردىڭ وزىندە جاعىمدى ناتيجەلەر جايلى ايتۋعا بولادى»، - دەيدى سانجار ەلۋبايەۆ.
ماسەلەن، ونىڭ ايتۋىنشا، سوڭعى جىلدارى ترانزيتتەن تۇسكەن كىرىس كولەمى كومپانيانىڭ جۇك باعىتىنداعى قىزمەتىنەن تۇسەتىن كىرىستەر قۇرىلىمىندا 30 پايىزعا جەتىپ وتىر.
2016-جىلى دۇنيەجۇزىلىك بانكتىڭ لوگيستيكا تيىمدىلىگى بويىنشا يندەكسىندە (LPI) قازاقستان 11- ورىنعا كوتەرىلىپ، ت م د ەلدەرىنەن ۇزدىك ناتيجەگە جەتتى، ياعني 160 مەملەكەتتىڭ اراسىندا 77-ورىنعا يە بولدى.
«الەمدىك وندىرۋشىلەر مەن لوگيستيكالىق كومپانيالاردىڭ ترانسقازاقستاندىق باعدارلارعا سەنىمى جىل ساناپ ارتۋدا. قىتاي-ەۋروپا-قىتاي ستراتەگيالىق باعىتىنداعى ترانزيت 2015-جىلى 47 مىڭ كونتەينەردى قۇراسا، 2016-جىلى 105 مىڭ كونتەينەرگە جەتتى، 2017-جىلى 200 مىڭ كونتەينەرگە جەتەدى دەپ جوسپارلاپ وتىرمىز، بۇل 2011-جىلدىڭ كورسەتكىشىمەن سالىستىرعاندا 200 ەسە كوپ»، - دەدى سانجار ەلۋبايەۆ.
اۆتور: مارلان جيەمباي