بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ىشكى ىستەر ورگاندارى قىزمەتىنىڭ ماسەلەلەرى بويىنشا قوعامدىق كەڭەستىڭ ءتوراعاسى، زاڭ عىلىمدارىنىڭ دوكتورى، پروفەسسور مارات قوعاموۆ ءمالىم ەتتى.
«قىزمەتتىك تەكسەرىستەردەن انىقتالعانىنداي، بىلتىر سىني ماقالالارعا بايلانىستى 92 ادام جازاعا تارتىلدى، بيىل شامامەن 50 قىزمەتكەر جازالاندى. 2015 -جىلى 350 سىني ماقالا جاريالانعان، 2016 -جىلى جاريالانىمدار سانى 200 دەن اسادى. تيىسىنشە، 92 جانە 50 قىزمەتكەر تارتىپتىك جازاعا تارتىلعان»، - دەپ اتاپ ءوتتى ول.
ونىڭ سوزىنە قاراعاندا، حالىقتىڭ ارىز- شاعىمىنا بايلانىستى قىزمەتتىك تەكسەرىستەر جۇرگىزىلىپ، ارتىنشا قىلمىستىق جاۋاپكەرشىلىككە تارتىلعان پوليتسەيلەردىڭ سانى ودان بىرنەشە ەسە كوپ. جالپى ازاماتتاردان جىل سايىن پوليتسەيلەردىڭ ارەكەتتەرىنە جانە كەرىسىنشە ارەكەتسىزدىگىنە قاتىستى 10 مىڭنان استام ارىز تۇسەدى.
«ارىز- شاعىمدارعا كەلەتىن بولساق، ولاردىڭ سانى مىڭداپ سانالادى. جىل سايىن پوليتسەيلەرمەن زاڭ بۇزۋ بويىنشا 10 مىڭنان استام ارىز- شاعىم تۇسەدى. ونىڭ جارتىسى اقپاراتتى تىركەۋ كىتابىنا تىركەلەدى. بىلتىرعى جانە اعىمداعى جىلدى الىپ قارايتىن بولساق، 2015 -جىلى 200 ادام قىلمىستىق جاۋاپكەرشىلىككە تارتىلىپ، سوتتالسا، 2016 -جىلدىڭ 10 ايىندا شامامەن تاعى سونشا قىزمەتكەر جاۋاپقا تارتىلدى. بۇل جەكە جانە زاڭدى تۇلعالاردىڭ ارىز- شاعىمى بويىنشا. ونىڭ ىشىندە ب ا ق بەتتەرىندەگى سىني باسىلىمدار دا بار»، - دەپ اتاپ ءوتتى م. قوعاموۆ.
ايتا كەتەيىك، سوڭعى كەزدەرى پوليسەيلەردىڭ جاعا ۇستاتارلىق ارەكەتتەرى ب ا ق بەتتەرىندە كوپتەپ قىلاڭ بەرۋدە. جاقىندا عانا استانادا موناكو كوميسسارىنا ايىپپۇل سالماق بولعان پوليتسەيلەر جۇمىستان قۋىلدى. ولارعا قاتىستى ق ر قىلمىستىق كودەكسىنىڭ 366 - بابى - «پارا الۋ» بويىنشا قىلمىستىق ءىس قوزعالدى. سونىمەن قاتار بيىل الماتىدا كولىكتە وتىرىپ دارەت سىندىرعان پوليتسەي مەن ونىڭ ارىپتەسى جۇمىستان بوساتىلدى.
اۆتور: جاسۇلان جولدىبايەۆ