رەسەي «بايقوڭىر» كەشەنىن جالعا الۋعا جىل سايىن 200 ميلليون ا ق ش دوللارىن جۇمسايدى
23:37, 01 - مامىر 2016
استانا. قازاقپارات - رەسمي دەرەككوزدىڭ مالىمەتتەرى بويىنشا، رەسەي فەدەراتسياسى «بايقوڭىر» كەشەنىن جالعا الۋعا جىل سايىن 200 ميلليون ا ق ش دوللارىن جۇمسايدى.
1994 -جىلعى 10 - جەلتوقسانداعى قازاقستان رەسپۋبليكاسى ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن جالعا الۋ جونىندەگى كەلىسىمگە سايكەس «بايقوڭىردى» جالعا الۋ قۇنى 115 ميلليون ا ق ش دوللارىن قۇرايدى.
الايدا، «بايقوڭىر» كەشەنىن جالعا الۋ كەلىسىمىنىڭ ەرەكشەلىگى - كەشەندى جالعا الۋدان باسقا ونى كۇردەلى جوندەۋدەن وتكىزۋ، قايتا وڭدەۋ مەن اعىمداعى قوسىمشا شىعىندارمەن قاتار بايقوڭىر قالاسىنىڭ تىرشىلىگىن قارجىلاندىرۋ دا كوزدەلگەن.
وسىعان وراي رەسەي فەدەراتسياسى جالعا الۋ تولەمىنەن باسقا «بايقوڭىر» كەشەنى مەن بايقوڭىر قالاسىن ۇستاپ تۇرۋعا، ونىڭ دامۋىنا جىل سايىن 6 ميلليارد رۋبل (92 ميلليون ا ق ش دوللار) ءبولىپ وتىر.
سول سەبەپتى، رەسەي فەدەراتسياسى جالعا الۋعا جىل سايىن 200 ميلليون ا ق ش دوللارىن جۇمسايدى.