«شاعىم سوت الدىنداعى تەرگەۋ كەزىندە تۇسپەگەن، ول بىزگە پوشتا ارقىلى كەلدى. قاراعاندى اكىمى قىلمىستىق قۇقىقبۇزۋشىلىق ارقىلى كەلتىرىلگەن مۇلىكتىك زالالدى وتەۋ بويىنشا سوتقا شاعىم ءتۇسىردى»، - دەدى ءتوراعالىق ەتۋشى سۋديا يسلامحان ەسەنبايەۆ.
ازاماتتىق شاعىمدا وبلىس ورتالىعىندا جارىقتاندىرۋ تىرەگىن ورناتۋ ىسىنە قاتىستى زالال كورسەتىلگەن. تەرگەۋ نۇسقاسى بويىنشا، بۇل جۇمىسقا «ستال سينك» ج ش س كاسىپورنى تارتىلعان. ونىڭ نەگىزىن قالاعانداردىڭ ءبىرى - س. احمەتوۆتىڭ ۇلى.
تاعىلعان ايىپقا سايكەس، جۇمىسقا اقشا كوتەرىڭكى باعامەن تولەنگەن. «ايىپتالۋشىلار جاساعان بۇل قىلمىس سالدارىنان مەملەكەتكە جالپى سوماسى 201 ميلليون 947 مىڭ 426 تەڭگە بولاتىن زالال كەلتىرىلدى»، - دەلىنگەن شاعىمدا.
قاراعاندى اكىمى بۇل سومانى ايىپتالۋشىلاردان وتەۋدى سۇرادى.
سوتتالۋشىلار بۇل شاعىممەن كەلىسپەدى. «بۇل شاعىم ۋاقىتىنان بۇرىن جانە زاڭسىز جاسالىپ وتىر دەپ ەسەپتەيمىن»، - دەدى قاراعاندى وبلىسىنىڭ ەكس-اكىمى ب. ابدىشيەۆ.