الماتىدا سەل تاسقىنى بولعان ايماقتا 200 دەن استام پوليتسيا قىزمەتكەرى تاۋلىك بويى كەزەكشىلىك ەتۋدە
بۇل تۋرالى بۇگىن سەلدەن زارداپ شەككەندەرگە كومەك كورسەتۋ جۇمىستارىن ۇيىمداستىرۋعا قاتىستى «نۇر وتان» پارتياسىنىڭ الماتى قالالىق فيليالى اكتيۆىنىڭ وتىرىسىندا الماتى ق. ءى ءى د كادرلىق جۇمىستار باسقارماسىنىڭ باستىعى، پوليتسيا پودپولكوۆنيگى ولجاس مىرزابەكوۆ مالىمدەدى.
«23- شىلدەگە قاراعان ءتۇنى ساعات 03:00 تە كەزەكشى بولىمگە سەل تاسقىنى تۋرالى حابار جەتىسىمەن وقيعا ورنىنا جول-پاترۋلدىك پوليتسيا ەكيپاجى جەتتى. دابىل بويىنشا ناۋرىزباي اۋداندىق ىشكى ىستەر دەپارتامەنتى كوتەرىلىپ، وقيعا ورنىنا باعىتتالدى. ارتىنشا، باسقا دا كۇشتىك قۇرىلىمدارمەن بىرلەسە وتىرىپ، تۇرعىنداردى كوشىرۋ شاراسى جۇرگىزىلدى. قازىرگى ساتتە وقيعا ايماعىندا تاۋلىكتىك رەجىمدە 200 دەن استام پوليتسيا قىزمەتكەرى قوعامدىق ءتارتىپتى قورعاۋ جانە جول قوزعالىسىن رەتتەۋ بويىنشا ءوز مىندەتتەىرىن اتقارىپ جاتىر. ءۇي توناۋشىلاق ارەكەتتەرگە قارسى شارالار قولدانىلىپ جاتىر. بۇل جۇمىس دەپارتامەنت باستىعى مەن ىشكى ىستەر ءمينيسترىنىڭ باقىلاۋىنا الىندى. جاعداي قالىپتى»، - دەدى و. مىرزابەكوۆ.
ءوز كەزەگىندە الماتى قالاسى توتەنشە جاعدايلار دەپارتامەنتىنىڭ ءورت قاۋىپسىزدىگى باسقارماسىنىڭ باستىعى، ورتكە قارسى قىزمەت مايورى مارات بەكبايەۆ دەپارتامەنتتىڭ بارلىق قىزمەتى سەل سالدارىن جويۋعا جۇمىلدىرىلعانىن جەتكىزدى.
«قازىر قاراعايلى، تاۋسامالى جانە قالانىڭ تومەنگى جاعىنداعى ەلدى مەكەندەردە، ولاردىڭ ىشىندە الاتاۋ اۋدانىنا قاراستى العاباس كەنتىندە سەل سالدارىن جويۋ جۇمىستارى جۇرگىزىلىپ جاتىر. الماتى اكىمدىگى تاراپىنان اۋلالار مەن جولداردى تازارتۋ جۇمىستارىنا تەحنيكالار ءبولىندى. دەگەنمەن، تەحنيكالاردىڭ ءالى دە كوپتەپ جەتكىزىلە تۇسكەنىن قالار ەدىك. ەرىكتىلەر جەكە قۇرامدى ازىق-تۇلىكپەن قامتاماسىز ەتىپ جاتىر. جۇمىس قالىپتى جاعدايدا جۇرگىزىلۋدە. وعان باسقا دا كوممۋنالدىق قىزمەتتەر دە ات سالىسىپ جاتىر»، - دەدى م. بەكبايەۆ.
اۆتور: جاپپاربەرگەن ايبوتا