ساحنالاندىرىلعان سالتاناتتى شارانى تاماشالاۋعا الەمنىڭ تۇكپىر- تۇكپىرىنەن تۋريستەر اعىلىپ كەلىپ جاتىر. تالاي تاريحتى ىشىنە بۇككەن ۆاتەرلوو الاڭى بۇگىن زەڭبىرەك داۋسى مەن اسكەريلەردىڭ دۇبىرىنەن تاعى دا ءبىر سىلكىندى. ءبىراق بۇل جولى جاپا شەككەندەر جوق. 1815 -جىلى ناپولەوندى تىزە بۇكتىرگەن شايقاس الەم تاريحىن باسقا ارناعا بۇرعان بولاتىن. كەلەر ۇرپاق قۇرمەت تۇتۋى ءتيىس شارانىڭ شىمىلدىعىن بەلگيانىڭ پرەمەر ءمينيسترى اشتى. شارل ميشەل، بەلگيانىڭ پرەمەر- ءمينيسترى: - ۆاتەرلوو - بۇل ۇلكەن تراگەديا، ۇمىتىلماس تاريح. وتكەننەن قانداي ساباق الىپ، وي تۇيدىك؟ مىنە، بۇل سۇراقتارعا وسى كورىنىستەردەن جاۋاپ الاسىز. قۇرمەتتى قوناقتاردىڭ ورتاسىنان بريتاندىق حانزادا چارلز بەن جارى كاميللا دا بوي كورسەتتى. ال شايقاستى بەينەلەيتىن قويىلىم كەشكە باستالادى.
XIX عاسىرداعى وقيعانى قاز- قالپىندا قايتالايتىن قويىلىمعا 5 مىڭ جاياۋ اسكەر مەن 360 كاۆالەر جۇمىلدىرىلعان. پولين، فرانسيالىق قۇراستىرۋشى: - مەن ءۇشىن بۇل وقيعانىڭ ماڭىزى زور. ارينە، وسى شايقاستا ءبىز فرانسۋزدار ۇتىلدىق. ءبىراق ونىڭ تاريحي ورنى ۇلكەن. ناپولەون جەڭگەندە نە بولار ەدى؟ ءبىز بۇل جەرگە بونوپارتتى اقتاۋ ءۇشىن ەمەس، تاريحقا قۇرمەت كورسەتۋ ءۇشىن كەلىپ تۇرمىز. الاڭعا جينالعان كوپشىلىك تەك كوڭىل كوتەرىپ قانا قويماي، مايدان دالاسىندا جەر جاستانعان 46 مىڭ جاۋىنگەردى دە ازا تۇتتى. سول ۋاقىتتاعى جۇلدىزدارى قايشى بولعان ۆەللينگتون، بوناپارت، ۆالشتات ۇرپاقتارىنىڭ باسى بۇگىن ۆاتەرلوودا قايتادان توعىستى. ءبىراق سوعىس ءۇشىن ەمەس، كەلىسىم ءۇشىن.