گرەكيانىڭ ەۋروايماقتان شىعۋى 2008 - جىلعىدان دا اۋىر داعدارىس تۋدىرادى
07:38, 08 - قاڭتار 2015
استانا. قازاقپارات - گرەكياداعى سايلاۋدا وپپوزيتسيا جەڭىسكە جەتىپ، ەلدىڭ ەۋرو ايماقتان شىعۋ تۋرالى شەشىم قابىلدانعان جاعدايدا، قارجى نارىعىندا تۇراقسىزدىق تۋىپ، ونىڭ سالدارى 2008 - جىلعى الەمدىك داعدارىستان دا اۋىر ءتۇسۋى مۇمكىن،
دەپ مالىمدەدى بەركلي كاليفورنيالىق ۋنيۆەرسيتەتىنىڭ ەكونوميكا جانە ساياسي عىلىمدارىنىڭ پروفەسسورى، ەكونوميست بارري ەيحەنگرين Marketwatch باسىلىمىنا.
«گرەكيانىڭ ەۋرو ايماقتان شىعۋى كوپتەگەن ەلدەرگە اسەر ەتەدى، ينۆەستورلىق ورتادا ەۋروپالىق ۆاليۋتالىق وداقتان كەلەسى قاي ەل شىعادى دەگەن اڭگىمەلەر تۋىندايدى. بۇل Lehman Brothers بانكىندە بولعان جاعدايدان ەكى ەسە قاۋىپتى»، - دەپ ەسەپتەيدى ەيحەنگرين.
ەكونوميست بولجامىنشا، ەۆروپالىق ساياساتكەرلەر گرەكيانى مۇشەلىكتە ساقتاپ قالۋ ءۇشىن قولىنان كەلەتىن مۇمكىندىكتەردىڭ بارلىعىن پايدالانادى.
«ەگەر ەۋرو ايماقتى ساقتاپ قالۋ ارەكەتتەرى شىعىندى، اسا اۋىر بولسا، وندا ەۋروپالىق ۆاليۋتالىق بلوكتىڭ ىدىراۋى ودان دا كوپ شىعىن اكەلىپ، ودان دا اۋىر قيىندىقتار تۋدىرادى»، - دەدى ەيحەنگرين.