جادىگەر مۇراجاي قورىن بايىتۋ ماقساتىندا سامارقان وبلىسىنا جاسالعان ەكسپەديتسيا كەزىندە تابىلعان.
عالىمداردىڭ ايتۋىنشا، بيىكتىگى 37 س م، ديامەترى 52 سم بولاتىن قولا ىدىس ساق تايپالارىنا تيەسىلى جانە ءبىزدىڭ داۋىرىمىزگە دەيىنگى II- I عاسىرلارعا جاتادى.
تۇرمىستىق زاتتى 1993 -جىلى سامارقان قالاسىنىڭ پايارىق اۋدانىنىڭ تۇرعىنى انۆار شوگدوروۆ ارىق قازىپ جاتقان جەرىنەن تاۋىپ العان. زاتتى تاۋىپ العان تۇرعىن ونىڭ بىرەگەي جادىگەر ەكەنىن بىلمەگەن جانە ونى قوسپا جەمدى دايىنداۋ ءۇشىن پايدالانعان.
مادەني مۇرا اگەنتتىگىنىڭ حابارلاۋىنشا، ساق داۋىرىنە جاتاتىن قولا قازاندار قوشرابات وڭىرىندەگى قاراقشى تاۋىنىڭ باۋرايىندا جانە پايارىق وڭىرىندەگى كوكتەپا ارحەولوگيالىق ەسكەرتكىشى اۋماعىنان دا تابىلعان. ەجەلگى ۋاقىتتا ولار سۇيىق ونىمدەر ءۇشىن دە، ماسايتاتىن سۋسىندار دايىنداۋ ءۇشىن دە قولدانىلعان. ولاردى ەت پىسىرۋگە، ءدىني راسىمدەرگە جانە قۇرباندىق شالۋعا پايدالانعان دەگەن پىكىرلەر دە بار.