الماتىدا بوي كوتەرەتىن حالىقارالىق دارەجەدەگى مەديتسينالىق ورتالىقتىڭ قۇرىلىسى 2000 ادامدى جۇمىسپەن قامتاماسىز ەتەدى
بۇل تۋرالى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى حابارلادى.
باسقارما باسشىسى ءۋاليحان احمەتوۆتىڭ ايتۋىنشا، Almaty Mount Sinai Hospital ەمحاناسىندا 102 ورىندىق ستاتسيونار، executive كلاسىنداعى 21 پالاتا، 57 ءبىر ورىندىق پالاتا، 16 ينتەنسيۆتى تەراپيا جانە 8 شاقالاقتاردى كۇتۋ پالاتاسى بولادى.
سونداي-اق، ورتالىقتا 6 زاماناۋي وپەراتسيالىق بولمە، كۇندىزگى ستاتسيونار، امبۋلاتوريالىق بولىمشە جۇمىس ىستەيتىن بولادى.
جاڭا نىساندا 689 مەديتسينالىق مامان، ونىڭ ىشىندە 133 دارىگەر، 287 ورتا مەدپەرسونال ەڭبەك ەتەتىن بولادى.
ەمحانادا ايەل دەنساۋلىعى ورتالىعى، ونكولوگيالىق، ورتوپەديالىق، دياگنوستيكالىق ورتالىقتار اشىلادى. جالپى كولەمى 32500 شارشى مەتر بولاتىن عيماراتتىڭ قۇرىلىسى كەزىندە 2000 ادامدى جۇمىسپەن قامتۋ كوزدەلىپ وتىر.
ايتا كەتۋ كەرەك، ەمحانا نيۋ-يوركتاعى Mount Sinai Hospital حالىقارالىق مەديتسينالىق ەمحانالار جەلىسىمەن ارىپتەستىك اياسىندا جەكە ينۆەستورلاردىڭ قارجىسىنا سالىنباق. وسىنداي مۇمكىندىكتى كەشە الماتى اكىمى باۋىرجان بايبەك پەن «ماۋنت سيناي» حالىقارالىق مەديتسينالىق جەلىسىنىڭ وكىلدەرى تالقىلادى.
مامانداردىڭ ايتۋىنشا، حالىقارالىق نىسان مەديتسينالىق تۋريزمدى دامىتۋعا ءوز ىقپالىن تيگىزەدى. دەنساۋلىق ساقتاۋ سالاسىنىڭ دامۋى - «الماتى-2020» دامۋ باعدارلاماسىنداعى باسىم باعىتتاردىڭ ءبىرى. قالاداعى دەنساۋلىق ساقتاۋ سالاسىنىڭ دەڭگەيى بىرنەشە ساتىعا ءوستى.
اۆتور: گۇلميرا عوسمانالي