«گولدەن ستەيت ۋورريورز» جۇلدىزى الاڭداعى جالاقىسى مەن جارنامالىق كەلىسىمدەردەن تۇسەتىن كىرىستى قوسقاندا، الداعى ءبىر جىلدا 203,6 ميلليون دوللار تابىس تابادى دەپ بولجانىپ وتىر. وسىلايشا، ول Forbes نۇسقاسى بويىنشا 2026-جىلعى ەڭ كوپ تابىس تاباتىن باسكەتبولشىلار رەيتينگىندە كوش باستادى.
كارري باسكەتبول تاريحىندا ءبىرقاتار رەكورد ورناتقان ويىنشى رەتىندە تانىمال. 2016-جىلى ول ۇلتتىق باسكەتبول قاۋىمداستىعىنىڭ (NBA) ەڭ قۇندى ويىنشىسى (MVP) اتاعىن ءبىراۋىزدان العان العاشقى باسكەتبولشى بولدى.
38 جاستاعى كارري باسكەتبولدىڭ ويىن مانەرىن عانا وزگەرتكەن جوق. ول كاسىبي سپورتتاعى تابىس دەڭگەيىنىڭ دە جاڭا بەلەستەرگە كوتەرىلۋىنە ىقپال ەتتى.
كارريدىڭ تابىسى قالاي ءوستى؟
كارري ۇ ب ق تاريحىندا ءبىر ماۋسىمداعى جالاقىسى 40 ميلليون دوللاردان اسقان العاشقى ويىنشى بولدى. بۇل مەجەگە ول 2019/2020-جىلعى ماۋسىمدا جەتتى. ال 2023/2024-جىلعى ماۋسىمدا جالاقىسى 50 ميلليون دوللاردان استى. Forbes بولجامى بويىنشا، 2026/2027-جىلعى ماۋسىمدا ونىڭ الاڭداعى تابىسى 62,6 ميلليون دوللارعا جەتەدى.
بىلتىر كۇزدە كارري ۇزاق ۋاقىت بىرگە جۇمىس ىستەگەن Under Armour كومپانياسىمەن سەرىكتەستىگىن توقتاتتى. ال بيىل ماۋسىمدا قىتايدىڭ Li-Ning سپورتتىق برەندىمەن جاڭا كەلىسىمگە كەلگەنى جاريالاندى. جارنامالىق كەلىسىمدەر مەن باسقا دا بيزنەس جوبالارىنان تۇسەتىن كىرىستى ەسەپتەگەندە، باسكەتبولشىنىڭ الاڭنان تىس تابىسى 141 ميلليون دوللار بولادى دەپ كۇتىلەدى.
بۇل – ۇ ب ق ويىنشىسىنىڭ الاڭنان تىس تاپقان تابىسى بويىنشا بۇرىنعى رەكوردتان ەداۋىر جوعارى كورسەتكىش. كارريدىڭ ءوزى 2024/2025-جىلعى ماۋسىمدا وسى سانات بويىنشا 100 ميلليون دوللار تابىس تاپقان ەدى.
الاڭداعى جانە الاڭنان تىس كىرىسىن قوسقاندا، ونىڭ الداعى ءبىر جىلداعى جالپى تابىسى 203,6 ميلليون دوللارعا جەتۋى مۇمكىن. 1990-جىلدان بەرى سپورتشىلاردىڭ تابىسىن باقىلاپ كەلەدى. وسى ۋاقىت ىشىندە، ينفلياتسيانى ەسەپكە الماعاندا، ءبىر جىلدا 200 ميلليون دوللاردان استام تابىس تاپقان سپورت جۇلدىزدارى ساناۋلى عانا. ولاردىڭ قاتارىندا بوكسشى فلويد مەيۆەزەر، فۋتبولشى كريشتيانۋ رونالدۋ جانە گولفشى دجون رام بار.
رەيتينگتە كارريدەن كەيىن كىمدەر تۇر؟
كارري ەكىنشى جىل قاتارىنان ۇ ب ق- نىڭ ەڭ كوپ تابىس تاباتىن ويىنشىلارى ءتىزىمىن باستاپ تۇر. ال 11-ماۋسىم بويى وسى رەيتينگتە كوش باستاعان لەبرون دجەيمس بيىل ءتورتىنشى ورىنعا ءتۇستى. ونىڭ جالپى تابىسى 93,9 ميلليون دوللار دەپ باعالانعان.
شىلدە ايىندا دجەيمس «فيلادەلفيا سيەۆەنتي سيكسەرس» كلۋبىمەن ارداگەر ويىنشىلارعا ارنالعان ەڭ تومەنگى جالاقى مولشەرىندە كەلىسىمشارتقا وتىرعان. ەكى جىلدىق كەلىسىمنىڭ ءبىرىنشى ماۋسىمىنداعى جالاقىسى - 3,9 ميلليون دوللار.
رەيتينگتە دجەيمستەن جوعارى تۇرعان تاعى ەكى باسكەتبولشى بار. «حيۋستون روكەتس» شابۋىلشىسى كيەۆين ديۋرانتتىڭ تابىسى 104,9 ميلليون دوللارعا باعالانسا، ياننيس ادەتوكۋنبو 103,5 ميلليون دوللار تابۋى مۇمكىن.
Forbes دەرەگىنشە، 2026/2027-جىلعى ماۋسىمدا ۇ ب ق- نىڭ ەڭ كوپ تابىس تاباتىن ون ويىنشىسى، سالىقتار مەن اگەنتتەردىڭ كوميسسياسىن ەسەپتەمەگەندە، 958 ميلليون دوللار تابىس تابادى. بۇل 2025-جىلعى 902 ميلليون دوللارلىق رەكوردتان 6 پايىز جوعارى. ال ون جىل بۇرىنعى كورسەتكىشپەن سالىستىرعاندا، ولاردىڭ جيىنتىق تابىسى ەكى ەسەدەن دە كوپ وسكەن: 2016/2017-جىلعى رەيتينگتە بۇل سوما 449 ميلليون دوللار بولعان.
ۇزدىك وندىق ويىنشىلارىنىڭ الاڭنان تىس تابىسى 469 ميلليون دوللارعا جەتەدى دەپ كۇتىلەدى. بۇل بىلتىرعى 380 ميلليون دوللارلىق رەكوردتان شامامەن 90 ميلليون دوللارعا ارتىق. Forbes باعالاۋىنشا، باسقا سپورت تۇرلەرىندەگى ەڭ كوپ تابىس تاباتىن ون سپورتشىنىڭ الاڭنان تىس كىرىسى فۋتبولدا 281 ميلليون، بەيسبول جوعارى ليگاسىندا (MLB) 144 ميلليون، امەريكالىق فۋتبول ليگاسىندا (NFL) 84 ميلليون، ال حوككەيدە (NHL) 16 ميلليون دوللاردى قۇرايدى.
ۇ ب ق ويىنشىلارىنىڭ جالاقىسى نەگە ءوسىپ كەلەدى؟
ۇزدىك وندىقتاعى ويىنشىلاردىڭ الاڭداعى جالاقىسى بيىل جالپى 489 ميلليون دوللار بولادى دەپ بولجانعان. بۇل سوڭعى ەكى ماۋسىمداعى كورسەتكىشتەن تومەن. Forbes مۇنى 41 جاستاعى لەبرون دجەيمستىڭ مانسابىنىڭ سوڭعى كەزەڭىندە تاعى ءبىر چەمپيوندىق اتاققا قول جەتكىزۋ مۇمكىندىگىن ارتتىرۋ ءۇشىن جالاقىسىن ازايتۋعا كەلىسكەنىمەن بايلانىستىرادى.
قازىر ۇ ب ق- داعى جالاقى شەگى 165 ميلليون دوللاردى قۇرايدى. بۇل - ون جىل بۇرىنعى دەڭگەيدەن 75 پايىز جوعارى. ليگا بيزنەسىنىڭ ءوسۋى ويىنشىلار تابىسىنىڭ دا ارتۋىنا جول اشىپ وتىر. ۇجىمدىق كەلىسىمگە سايكەس، باسكەتبولعا قاتىستى كىرىستەردىڭ شامامەن 50 پايىزى ويىنشىلارعا تيەسىلى.
وسىدان ون جىل بۇرىن ۇ ب ق- دا ەڭ جوعارى جالاقى العان ويىنشى لەبرون دجەيمس بولاتىن. ونىڭ ءبىر ماۋسىمداعى تابىسى 31 ميلليون دوللار ەدى. قازىر بۇل كورسەتكىشتەن اسىپ تۇسەتىن ويىنشىلار سانى الدەقايدا كوپ. Spotrac دەرەگىنە سۇيەنسەك، 2026/2027-جىلعى ماۋسىمدا ۇ ب ق- نىڭ 59 ويىنشىسى وسى مەجەدەن جوعارى جالاقى الادى.
2024-جىلى ۇ ب ق ۇلتتىق تەلەارنالارمەن جالپى قۇنى 76 ميلليارد دوللار بولاتىن 11 جىلدىق كەلىسىم جاساستى. ول وتكەن ماۋسىمنان باستاپ كۇشىنە ەندى. سول كەزدە كەي ساراپشىلار جالاقى شەگى 10 پايىز وسەدى دەپ بولجاعان. الايدا ءىس جۇزىندە ءوسىم تومەندەۋ بولدى: بيىل جالاقى شەگى 6,7 پايىز ارتتى. 2027/2028-جىلعى ماۋسىمدا دا ءوسىم شامامەن وسى دەڭگەيدە بولادى دەپ كۇتىلەدى.
بۇعان جەرگىلىكتى سپورتتىق تەلەارنالار نارىعىنداعى تۇراقسىزدىق تا اسەر ەتىپ وتىر. سوعان قاراماستان ليگاداعى ويىنشىلار تابىسىنىڭ ءوسۋى توقتايدى دەۋگە نەگىز جوق. كەلەسى ماۋسىمدا كارريدىڭ جالاقىسى قايتادان 60 ميلليون دوللاردان تومەن ءتۇسۋى مۇمكىن. ول قىركۇيەكتە «گولدەن ستەيتپەن» ەكى جىلعا 116 ميلليون دوللارلىق كەلىسىمشارتتى ۇزارتتى.
الداعى جىلدارى ۇ ب ق- دا بۇدان دا جوعارى جالاقى مەجەلەرى بەلگىلەنۋى ىقتيمال. Forbes بولجامى بويىنشا، 2029/2030-جىلعى ماۋسىمدا ويىنشىلاردىڭ جالاقىسى 70 ميلليون دوللارلىق مەجەدەن اسۋى مۇمكىن.
رەيتينگ قالاي جاسالدى؟
Forbes جاساعان تابىسى ەڭ جوعارى ويىنشىلار رەيتينگى 2026/2027-جىلعى ماۋسىمعا ارنالعان كەلىسىمشارتتارعا نەگىزدەلگەن. ەسەپكە 2026-جىلعى 19-قازانعا دەيىن جاسالعان كەلىسىمدەر ەنگىزىلگەن. الاڭداعى جالاقى مولشەرى 100 مىڭ دوللارعا دەيىن دوڭگەلەكتەلگەن. ال جەكە نەمەسە كوماندالىق ناتيجەلەرگە بايلانىستى بەرىلەتىن بونۋستار ەسەپكە الىنباعان.
الاڭنان تىس تابىس سالالىق ساراپشىلارمەن جۇرگىزىلگەن سۇحباتتار نەگىزىندە باعالانعان. وعان جارنامالىق كەلىسىمدەردەن، ليتسەنزيالاۋدان، ءتۇرلى ءىس-شارالارعا قاتىسۋدان، ەستەلىك زاتتار ساتۋدان جانە سپورتشىنىڭ ەلەۋلى ۇلەسى بار كاسىپورىنداردان تۇسەتىن كىرىس كىرەدى. ينۆەستيتسيادان تۇسەتىن پايىزدار مەن ديۆيدەندتەر ەسەپكە الىنبايدى، الايدا سپورتشىنىڭ اكسيالارىن ساتۋدان تۇسكەن تابىس ەسكەرىلەدى. كورسەتىلگەن سومالاردان سالىقتار مەن اگەنتتەردىڭ كوميسسياسى شەگەرىلمەگەن.
el.kz