ونىڭ سوزىنشە، ۇكىمەت اتالعان سالا جونىندە تۇجىرىم جاساعاندا، بيزنەستىڭ جاپپاي قۇلدىراۋى جونىندەگى ەموتسيادان تۋعان قاۋەسەتكە ەمەس، رەسمي دەرەككە جۇگىنەدى.
سەرىك جۇمانعارين ناقتى ستاتيستيكانى كەلتىردى. ونىڭ ايتۋىنشا، 2026-جىلدىڭ باسىندا 2,44 ميلليون كاسىپكەرلىك سۋبەكتىسى تىركەلگەن. ال ءساۋىر ايىندا بۇل كورسەتكىش 2,66 ميلليونعا ۇلعايعان. بيىل العاشقى توقساننىڭ وزىندە قازاقستاندا 99 مىڭعا جۋىق جاڭا كومپانيا مەن جەكە كاسىپكەرلەر تىركەلگەن.
ال جابىلعان سۋبەكتىلەردىڭ سانى - 208 مىڭ شاماسىندا. ولاردىڭ باسىم بولىگى ونسىز دا جۇمىس ىستەمەي، توقتاپ تۇرعان.
- قىزمەتىن توقتاتقان بيزنەس سۋبەكتىلەرىنىڭ 95 مىڭدايى جابىلعانعا دەيىن دە كاسىپپەن اينالىسپاعان، كىرىس تۇسىرمەگەن. كەيبىر ازاماتتار باسقا كومپانيالاردا باسشى رەتىندە جازىلعان. ءوزىن-ءوزى جۇمىسپەن قامتۋشى رەتىندە تىركەلگەندەر دە كەزدەستى، - دەپ ءتۇسىندىردى ۆيتسە-پرەمەر.
سونىمەن بىرگە، ول بۇعان دەيىن ۇكىمەت 300 مىڭ بيزنەس سۋبەكتىسى جابىلادى دەپ بولجاعانىن اتاپ ءوتتى. ايتسە دە، بۇل سەكتوردا وڭ ديناميكا بايقالىپ وتىر. ق ق س تولەيتىندەر سانى 12 مىڭعا ارتقان.
سەرىك جۇمانعاريننىڭ مالىمدەۋىنشە، اتالعان وزگەرىستەر ىسكەرلىك سالانىڭ ناشارلاۋىن ەمەس، «نارىقتىڭ تازارۋىن» جانە بيزنەس ورتانىڭ قۇرىلىمدىق تۇرعىدا قايتا جاساقتالۋىن بىلدىرەدى.
ايتا كەتەيىك، بۇعان دەيىن سەرىك جۇمانعارين قۇرىلتاي سايلاۋىنىڭ شىعىندارى جونىندە پىكىر بىلدىرگەنىن جازعانبىز.