200 جاڭا ءوندىرىس ورنى اشىلىپ، 17 مىڭ جۇمىس ورنى قۇرىلادى

استانا. KAZINFORM - ەلىمىزدە جاڭا 17 مىڭنان استام جۇمىس ورنى اشىلاتىن 200 جوبا ىسكە اسىرىلادى. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى ەرسايىن ناعاسپايەۆ ايتتى.

Фото: Kazinform/ИИ

- مەملەكەت باسشىسى جولداۋىندا ەلىمىزدە وتاندىق ءوندىرىستى دامىتۋ، جاڭا كاسىپورىندار اشۋ جانە ونەركاسىپتىڭ مۇمكىندىگىن ارتتىرۋ بويىنشا ناقتى مىندەت قويدى. وسى ورايدا ونەركاسىپ سالاسىنداعى تۇراقتى ءوسىمدى ساقتاپ، ءوندىرىس كولەمىن ودان ءارى ارتتىرۋ ماڭىزدى. ون ايدىڭ قورىتىندىسى بويىنشا ءوندىرىس كولەمى %9,3- عا ءوسىپ، وڭ ديناميكا كورسەتتى. سالاعا سەرپىن بەرەتىن ماڭىزدى باعىتتاردىڭ ءبىرى - جالپى ينۆەستيتسيا كولەمى 1,7 تريلليون تەڭگەدەن اساتىن 200 جاڭا جوبانى ىسكە قوسۋ، - دەدى مينيستر.

ەرسايىن ناعاسپايەۆتىڭ ايتۋىنشا، اتالعان جوبالاردى ىسكە اسىرۋ ناتيجەسىندە 17 مىڭنان استام جاڭا جۇمىس ورنى اشىلادى. ونىڭ ىشىندە 5,5 مىڭ جۇمىس ورنى اۋىلدىق جەرلەردە قۇرىلادى. جوبالار تولىق قۋاتىنا شىققان جاعدايدا، جىل سايىن شامامەن 1,5 تريلليون تەڭگەنىڭ ءونىمى ءوندىرىلىپ، 500 ميلليارد تەڭگەسى ەكسپورتقا باعىتتالادى. جىل باسىنان بەرى جالپى ينۆەستيتسيا كولەمى 900 ميلليارد تەڭگە بولاتىن 125 جوبا ىسكە قوسىلدى. قالعان جوبالار اياقتالۋعا جاقىنداپ، ىسكە قوسۋعا دايىندالىپ جاتىر.

- ايتا كەتۋ كەرەك، بۇل جوبالار قازاقستاندا بۇرىن وندىرىلمەگەن جاڭا ءونىم تۇرلەرىن يگەرۋگە مۇمكىندىك بەرەدى. ولاردىڭ قاتارىندا تەمىرجول بانداجدارى، دوڭعالاقتار، پرەستەۋ جابدىقتارى، لامينات، تامشىلاتىپ سۋارۋ جۇيەلەرى جانە كوفە ماشينالارىنا ارنالعان اليۋميني كاپسۋلالار بار. مەملەكەتتىك قولداۋ شارالارىن ناقتى وندىرىسكە باعىتتاۋدا قازاقستاندىق تاۋار وندىرۋشىلەردىڭ سيفرلىق ءتىزىلىمى ماڭىزدى ءرول اتقارادى، - دەدى ول.

ونىڭ دەرەگىنشە، بۇگىندە تىزىلىمدە 50 مىڭنان استام ءوتىنىم قارالىپ، 2,6 مىڭعا جۋىق وتاندىق ءوندىرۋشى مەن ولاردىڭ 72 مىڭ تاۋارى تىركەلدى. ءتىزىلىمنىڭ نەگىزگى ساتىپ الۋ الاڭدارىمەن بىرىگۋى ناتيجەسىندە جىل باسىنان بەرى 94 مىڭ ساتىپ الۋدا وتاندىق ونىمگە باسىمدىق بەرىلدى. قوسىمشا ءونىمنىڭ ناقتى ەلدە وندىرىلەتىنىن راستاۋ جانە باقىلاۋ تەتىكتەرى جەتىلدىرىلىپ جاتىر.

- وسى ماقساتتا ءوندىرىستى سيفرلىق تەكسەرۋ جانە لوكاليزاتسياعا قويىلاتىن تالاپتار كۇشەيەدى. سونداي-اق كاسىپورىنداردىڭ قىزمەتىن تالداۋ ءۇشىن جاساندى ينتەللەكت، ءوندىرىس قۋات جۇكتەمەسىن باقىلاۋ ءۇشىن سيفرلىق داشبورد ەنگىزۋ جوسپارلانعان، - دەدى ەرسايىن ناعاسپايەۆ.

ايتا كەتەيىك، ۇكىمەت وتىرىسىندا وتاندىق تاۋار وندىرۋشىلەردى قولداۋ ماسەلەسى قارالىپ جاتىر.

اۆتورلار

مارلان جيەمباي