كەرەي مەن جانىبەككە ەرگەن 200 مىڭ قازاقتىڭ سانى جەر جۇزىندە 15 ميلليوننان استى - ەلباسى
بۇگىن تاۋەلسىزدىك سارايىندا قازاق حاندىعىنىڭ 550 جىلدىق مەرەيتويىنا ارنالعان سالتاناتتى جيىن بارىسىندا ەلباسى نۇرسۇلتان نازاربايەۆ وسىلاي دەي كەلە، تاعى مىڭداعان قازاق اشارشىلىق پەن سوعىستا قىرىلماسا، قانشا بولار ەدىك دەگەن ويىن جەتكىزدى.
«باسەكەگە قابىلەتتى ەلۋ ەلدىڭ قاتارىنان بەرىك ورىن الىپ، الەمدەگى ۇزدىك وتىزدىقتىڭ قاتارىنان كىرۋدى باستى ستراتەگيالىق ماقسات ەتىپ وتىرمىز. الدا استانادا عىلىم مەن تەحنيكاداعى، ونەركاسىپتەگى جاڭالىق اتاۋلىنى ناسيحاتتايتىن EXPO-2017 كورمەسىن وتكىزۋ مىندەتى بار. قازىر ادامزات قوعامى جاڭا يندۋستريالىق ريەۆوليۋتسيانىڭ قارساڭىندا تۇر. وعان قازاقستاننىڭ ەكونوميكاسى مەن ونەركاسىبى دايىن بولۋ ءۇشىن ءبىز ۇدەمەلى يندۋستيالىق- يننوۆاتسيالىق دامۋ باعدارلاماسىن جاساپ، ونىڭ ەكىنشى بەس جىلدىعىن ورىنداۋدامىز. بۇنى الەمدىك باسەكەگە قابىلەتتى بولۋ ءۇشىن جاساپ وتىرمىز» ، - دەيدى مەملەكەت باسشىسى.
ق ر پرەزيدەنتى اتاپ وتكەندەي، قازاقستان بيىل دۇنيەجۇزىلىك ساۋدا ۇيىمىنىڭ رەسمي مۇشەسى اتاندى، ەلىمىزدە بەس ينستيتۋتسيونالدى رەفورمانى جۇزەگە اسىرۋ جۇمىسى باستالدى. «ءتيىستى مەملەكەتتىك ورگاندار ونى (5 رەفورمانى - اگەنتتىك) رەت- رەتىمەن جۇزەگە اسىرۋعا كىرىسىپ كەتتى. بۇل رەفورما ءبىزدى جاڭا بيىكتەرگە باستايدى» ، - دەدى ن. نازاربايەۆ.
ال قازاق حاندىعىنىڭ 550 جىلدىعى تاقىرىبىنا ورالعان ەلباسى: «ەگەمەن بولماي، ەل بولماس» دەگەندەي، ءبىز ازاتتىق جىلدارىندا شىن مانىندە ۇلى جولدان وتتىك. تاۋەلسىزدىك كەزەڭى ءبىز ءۇشىن عاسىرلار جۇگىن ارقالاعان عالامات كەزەڭ بولدى. كەزىندە كەرەي مەن جانىبەككە ەرگەن حالىقتىڭ ۇزىن سانى 200 مىڭ شاماسىندا بولعان ەكەن. بۇگىندە سول قازاقتىڭ قاتارى جەر جۇزىندە 15 ميلليوننان اسىپ جىعىلدى. ال ەگەر قازاق وتكەن عاسىردىڭ اشارشىلىعىنا ۇشىراماسا، قان سوعىستا قىرىلماسا، قازاقتىڭ سانى قانشا بولار ەدى، وزدەرىڭىز ويلاپ كورىڭىزدەرشى.. .» - دەدى.
اۆتور: كەنجەكەي توقتامۇرات قىزى