«وتكەن 2022-جىل ءبىزدىڭ ەلىمىز ءۇشىن وڭاي بولعان جوق، ءبىراق سوعان قاراماستان مەملەكەتتىڭ بارلىق الەۋمەتتىك مىندەتتەمەلەرى ورىندالدى. 4,4 تريلليون تەڭگەدەن استام سوماعا 4,3 ميلليوننان استام قازاقستاندىققا زەينەتاقى، جاردەماقى جانە باسقا دا الەۋمەتتىك تولەمدەر ۋاقتىلى تولەندى. وتكەن جىلى 1,3 ميلليوننان استام وتباسى مەملەكەت كەپىلدىك بەرگەن تولەمدەر تۇرىندە قولداۋ الدى. ەرەكشە قاجەتتىلىگى بار بالالاردى تاربيەلەپ وتىرعان وتباسىلارعا جانە كوپبالالى وتباسىلارعا دا ەرەكشە كوڭىل ءبولىندى. وسى جىلى بالالارى بار وتباسىلاردى قولداۋعا رەسپۋبليكالىق بيۋجەتتەن جانە مەملەكەتتىك الەۋمەتتىك ساقتاندىرۋ قورىنان 926,6 ميلليارد تەڭگەدەن استام قاراجات ءبولىندى. بولىنگەن قاراجات بالا تۋۋ جانە بالا كۇتىمى بويىنشا تولەمدەر، كوپبالالى انالارعا، كوپبالالى وتباسىلارعا جانە مۇگەدەكتىگى بار بالالاردى تاربيەلەپ وتىرعان وتباسىلارعا جاردەماقى رەتىندە بەرىلدى. ءبىر وتباسىنا تولەنەتىن تولەم 20 مىڭنان 805 مىڭ تەڭگەگە دەيىنگى سومانى قۇرادى» دەلىنگەن مينيستر تامارا دۇيسەنوۆانىڭ جىل قورىتىندىسىنا ارنالعان حابارلاماسىندا.
ونىڭ ايتۋىنشا، ومىرلىك قيىن جاعدايعا تاپ بولعان 700 مىڭنان استام قازاقستاندىق وتباسى مەملەكەتتەن 70 ميلليارد تەڭگەدەن استام سوماعا اتاۋلى الەۋمەتتىك كومەك تۇرىندە قولداۋ العان.