2 ميلليارد اعاش ەگۋ تاپسىرماسى نەگە ورىندالمادى - ەكولوگيا ءمينيسترىنىڭ جاۋابى
استانا. KAZINFORM - مەملەكەت باسشىسىنىڭ 2025-جىلعا دەيىن 2 ميلليارد اعاش ەگۋ جونىندەگى تاپسىرماسىن ورىنداۋ 2027-جىلعا، ياعني ەكى جىلعا كەيىنگە شەگەرىلدى. ەكولوگيا جانە تابيعي رەسۋرستار ءمينيسترى ەرلان نىسانبايەۆ jibek Joly ارناسىنا بەرگەن سۇحباتىندا پرەزيدەنت تاپسىرماسى نە سەبەپتى ۋاقتىلى ورىندالماعانىن ءتۇسىندىرىپ بەردى، دەپ حابارلايدى Kazinform ءتىلشىسى.
ءمينيستردىڭ ايتۋىنشا، اعاش وتىرعىزۋ - كەشەندى ءىس. ونىڭ ىشىنە جۇمىس جوسپارىن ازىرلەۋ، تۇقىم جيناۋ مەن ونى ساقتاۋ، توپىراقتى دايىنداۋ، وتىرعىزۋ جۇمىسى، كۇتىپ-باپتاۋعا ارنالاعان شارالار كىرەدى. وتكەن جىلى مەملەكەتتىك ورمان قورىنا 1 ميلليارد 150 ميلليون كوشەت ماتەريالى ەگىلدى. تاپسىرمانىڭ تولىق كولەمدە ورىنداماۋىنا جەرگىلىكتى اكىمدىكتەردىڭ جەتكىلىكتى دەڭگەيدە اقشا بولمەۋى اسەر ەتكەن ەكەن.
- مەملەكەت باسشىسىنىڭ تاپسىرماسىن تولىق كولەمدە ورىنداماۋىنا كەلەر بولساق، باستى سەبەپ - جەرگىلىكتى اتقارۋشى ورگاندار تاراپىنان قارجىلاندىرۋدىڭ بولماۋى. باسا ايتقىم كەلەتىنى، مەملەكەتتىك ورمان قورىنىڭ 80 پايىزى اكىمدىكتەردىڭ قاراۋىندا. ولار تۇقىم جيناۋدان باستاپ بارلىق ساتىعا جاۋاپتى. وعان قوسا ماۋسىمدىق جۇمىسشىلاردىڭ سانىن ارتتىرۋ، ارنايى تەحنيكالار ساتىپ الۋ ماسەلەسى تۋىندادى، - دەدى ەرلان نىسانبايەۆ.
ءمينيستردىڭ سوزىنشە، پرەزيدەنت تاپسىراماسىنا دەيىن جىلىنا 50-55 مىڭ گەكتار القاپقا اعاش وتىرعىزىلىپ كەلگەن، قازىر كولەم ەكى ەسەدەن استام ۇلعايدى. سايكەسىنشە، تراكتور، اعاش وتىرعىزۋ تەحنيكالارى مەن جۇمىسشى سانىن ارتتىرۋ كەرەك. تۇقىم كولەمى دە 500 توننادان 1250 تونناعا دەيىن وسكەن.
- تۇقىمسىز كوشەت الۋ مۇمكىن ەمەس، ال تەحنيكاسىز مۇنداي كولەمدەگى تۇقىمدى ەگۋ تۋرالى ءسوزدىڭ ءوزى ارتىق. اتالعان باعىتتاعى جۇمىستار اۆتوماتتاندىرىلماعان، بارىنە جۇمىس كۇشى، تەحنيكا كەرەك ەكەنى تۇسىنىكتى. الەم ەلدەرى دە وسى جولمەن كەلە جاتىر، - دەپ اتاپ وتتى ەرلان نىسانبايەۆ.
ەرلان نىسانبايەۆتىڭ ايتۋىنشا، 2021-2023-جىلدارى جوسپارلانعان جۇمىستىڭ 70-75 پايىزى ورىندالدى. قالعان بولىگى 2026-2027-جىلدارعا شەگەرىلدى. 2023-جىلدان باستاپ مينيسترلىك تۇقىم جيناۋ ماسەلەسىن قاتاڭ باقىلاۋعا الدى. 10-تامىزعا دەيىن الداعى ەكى جىلعا ارنالعان كوشەت ءوسىرۋ بويىنشا بايانداما جاسالادى.
سۇحباتتىڭ تولىق نۇسقاسىن بۇگىن ساعات 19.30 دا Jibek Joly تەلەارناسىنان كورە الاسىزدار.
جالپى ەكى ميلليارد اعاش ەگۋ باستاماسى العاشقى جىلدارى-اق جوسپارداعى مەجەگە جەتە الماي، ارتتا قالا باستادى. قارقىندى قالپىنا كەلتىرىپ، قۋىپ جەتۋ نەگە مۇمكىن بولماي قالعانىن بۇعان دەيىن Kazinform اناليتيكالىق شولۋشىسى انىقتاپ كورگەن ەدى.