رەسەي سارى شاعان پوليگونىن جالداۋدى قىسقارتقاننان كەيىن بيۋدجەتكە ءتۇسىم 2,5 ميلليون دوللارعا ازايادى
بۇل تۋرالى بۇگىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «1996 - جىلعى 18 - قازانداعى قازاقستان رەسپۋبليكاسى مەن ر ف اراسىنداعى سارى شاعان سىناق پوليگونىن جالداۋ تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى تالقىلاۋ بارىسىندا ءمالىم بولدى.
حاتتاماعا 2015 - جىلى 16 - ساۋىردە ماسكەۋدە قول قويىلعان.
«رەسەي تاراپى سارى شاعان پوليگونىنان جالعا الىپ وتىرعان 8 ميلليون گەكتاردىڭ 1 ميلليون گەكتارى قىسقارتىلادى. وسىعان بايلانىستى جالداۋ سوماسى دا تۇزەتىلەتىن بولىپ وتىر. ناقتىلاپ ايتقاندا، جالداۋ سوماسى 2 ميلليون 656 مىڭ دوللارعا كەميدى»، - دەيدى ق ر قورعانىس ءمينيسترىنىڭ ورىنباسارى وقاس ساپاروۆ. ونىڭ ايتۋىنشا، رەسەي جالعا الىپ وتىرعان سارىشاعان پوليگون اۋماعى ءۇشىن 18 ميلليون 900 مىڭ دوللار تولەپ كەلگەن بولاتىن. ەندى بۇل سوما 2 ميلليون 656 مىڭ دوللارعا قىسقارادى.
«قالعان 16 ميلليون 276 مىڭ دوللاردى رەسەي اقشالاي بيۋدجەتكە اۋدارادى. رەسەيدىڭ جالداۋ سوماسى گەكتارىنا 2,33 دوللاردى قۇراپ وتىر. جالپى ءبىز رەسەيگە جالعا 10 ميلليون گەكتاردان استام جەر ۋچاسكەلەرىن پوليگون رەتىندە پايدالانۋعا جالعا بەرىپ كەلەمىز. بۇدان جىل سايىن بيۋدجەتكە 24 ميلليون دوللاردان استام سوما بيۋدجەتكە ءتۇسىپ كەلگەن بولاتىن. بۇل الداعى ۋاقىتتا قىسقارۋعا ۇشىرايدى»، - دەدى مينيستر ورىنباسارى.
ايتا كەتەرلىگى، رەسەيدەن قايتارىلعان جەرلەردەن جالداۋ اقىسى قىسقارتىلعانىمەن، ونىڭ ورنىن تولتىراتىن جانە ارتتىراتىن رەسپۋبليكالىق بيۋدجەتكە تولەمدەر تۇسىرەتىن جوبالار ىسكە اسىرىلماق. ماسەلەن، قازاقستاندىق شارۋاشىلىق سۋبەكتىلەردىڭ، پايدالى قازبالاردى وڭدەۋگە، پوليگوننىڭ اۋماعى ارقىلى وتەتىن تەمىرجول، اۆتوكولىك جانە اۋە جولدارىن پايدالانۋعا بايلانىستى جالداۋ اقىسى وتەلەدى. ياعني، حاتتاما تەرىس الەۋمەتتىك- ەكونوميكالىق سالدارعا سوقتىرمايدى.
زاڭ جوباسى پارلامەنت سەناتىنىڭ الداعى ۋاقىتتا وتەتىن جالپى وتىرىسىنا شىعارىلاتىن بولادى.
اۆتور: قانات مامەتقازى ۇلى