قازاقستان قىتايعا ەكسپورتتالاتىن ءونىمدى 2-3 ەسە ۇلعايتۋدى جوسپارلاۋدا
بۇل تۋرالى بۇگىن ق ر اۋىل شارۋاشىلىعى ۆيتسە-ءمينيسترى گۇلميرا يسايەۆا ءمالىم ەتتى
«سىزدەر بىلەسىزدەر، بىلتىر جەلتوقسان ايىندا قىتاي مەن قازاقستان اراسىندا استىق ەكسپورتىنىڭ جەڭىلدەتىلگەن فيتوسانيتارلىق كەلىسىمى جاسالدى. بۇل كەلىسىم بىزگە استىقتى جەڭىلدەتىلگەن تالاپپەن ەكسپورتتاۋعا مۇمكىندىك بەردى. بۇرىن ءبيدايدى تەك قاپپەن ەنگىزۋ تۋرالى قاتاڭ تالاپ قويىلاتىن. وسىنىڭ ارقاسىندا قازاقستان قىتايعا باعىتتاعان استىق ەكسپورتى ءتورت ەسەگە ءوستى. مىسالى، 2014-2015-جىلدارى قازاقستان استىعى 110 مىڭ تونناعا ەكسپورتتالسا، بيىل 414 مىڭ تونناعا جەتىپ ۇلگەردى»، - دەدى ۆيتسە-مينيستر.
گ. يسايەۆانىڭ ايتۋىنشا، قازاقستان پرەزيدەنتى نۇرسۇلتان نازاربايەۆتىڭ ق ح ر- نىڭ حاڭجوۋعا جاساعان ساپارى بارىسىندا قىتاي باسشىلىعىمەن ءتورت مەموراندۋمعا قول قويىلدى. ونىڭ ەكەۋى قىتاي مەن قازاقستاننىڭ اۋىل شارۋاشىلىعى مينيسترلىكتەرى اراسىندا جاسالعان. ونىڭ ەڭ باستىسى - قازاقستان وندىرەتىن اۋىل شارۋاشىلىعى تاۋارلارىنىڭ قىتايعا كەدەرگىسىز وتكىزىلۋىنە بايلانىستى.
«قازىرگى ۋاقىتتا ءبىز قىتاي تاراپىمەن قازاقستاندىق استىققا 500 مىڭ تونناعا كۆوتا بەرۋ ماسەلەسىن تالقىلاۋدامىز. كۆوتا استىقتىڭ قىتايعا كەدەرگىسىز وتۋىنە رۇقسات بەرەدى. ونىڭ كولەمى كەيىن 1 ميلليون تونناعا دەيىن جەتكىزىلەدى»، - دەدى ول.
ق ر ا ش م مال شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى ەركەبۇلان احمەتوۆتىڭ ءمالىم ەتۋىنشە، قازاقستاننىڭ ونىمىنە دەگەن سۇرانىس الداعى جىلدارى ارتا بەرمەك. قازاقستاننىڭ اۋىل شارۋاشىلىعى تاۋارلارىن وندىرۋشىلەر بۇل سۇرانىستى قاناعاتتاندىرۋعا دايىن.
«قازاقستان جالپى قىتايعا 120 ميلليون دوللارعا اۋىل شارۋاشىلىق ونىمدەرىن ەكسپورتتايدى. ەت جانە وسىمدىك شارۋاشىلىعى داقىلدارىن ەكسپورتتاۋ كولەمىن 2-3 ەسە ۇلعايتۋعا تولىقتاي مۇمكىندىك بار»، - دەپ اتاپ ءوتتى ەركەبۇلان احمەتوۆ.
اۆتور: جاسۇلان جولدىبايەۆ