بۇل تۋرالى بۇگىن يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مودجتابا داميرچيلۋ ءمالىم ەتتى.
«سانكسيا سالىنعانعا دەيىن يران تاۋلىگىنە ءتورت ميلليون باررەل مۇناي ءوندىرىپ، ونىڭ 2,1 ميلليونىن ەكسپورتقا شىعارىپ كەلگەن ەدى. سانكسيالاردىڭ سالدارىنان ەكسپورت كولەمى تاۋلىگىنە ءبىر ميلليون باررەلگە دەيىن تومەندەپ كەتتى. ال ەندىگى ۋاقىتتا يران بۇعان دەيىنگى كولەمدى ەكسپورتقا شىعارۋعا دايىن»، - دەدى ول ب ا ق وكىلدەرىنىڭ ساۋالىنا.
وسى ورايدا يران ەلشىسى تىلشىلەر تارابىنان تۋىنداعان تاعى ءبىر ساۋالعا وراي يراندا مۇناي ءوندىرۋدىڭ وزىندىك قۇنى باررەلىنە ون دوللاردى قۇرايتىندىعىن ايتا كەلە بۇگىنگى تاڭدا الەمدە ورىن الىپ وتىرعان قارا التىننىڭ باعاسى كوڭىلدەرىنەن شىعاتىندىعىن دا جاسىرمادى.
«ارينە، مۇناي باعاسى ارتا تۇسسە يراننىڭ پايدا تاباتىندىعى انىق. دەگەنمەن، ەسكەرەر تاعى ءبىر جايت بار. يران مۇنايىنىڭ وزىندىك قۇنى باسقا ەلدەرمەن سالىستىرعاندا ايتارلىقتاي تومەن»، - دەدى ول.
اۆتور: مارلان جيەمباي