جىل باسىنان قازاقستان شەكاراسىندا 1 تونناعا جۋىق ەسىرتكى تاركىلەندى

استانا. قازاقپارات - جىل باسىنان شەكارادا 940 كەلىدەن استام اۋىر ەسىرتكى زاتتارى تاركىلەندى. بۇل تۋرالى ۇلتتىق قاۋىپسىزدىك كوميتەتى شەكارا قىزمەتىنىڭ بيىلعى ءبىرىنشى جارتىجىلدىقتاعى قىزمەتتىنىڭ قورىتىندىسىنا ارنالعان بريفينگىدە شەكارالىق باقىلاۋ دەپارتامەنتى باستىعىنىڭ ءبىرىنشى ورىنباسارى عاني ءاعادىلوۆ ايتتى، دەپ حابارلايدى قازاقپارات ءتىلشىسى.

شەكارا قىزمەتى حالىقارالىق قاتىناستار جولدارىندا ەسىرتكىنىڭ زاڭسىز اينالىمىنىڭ جولىن كەسۋ بويىنشا بەلسەندى جۇمىستاردى ىسكە اسىرىپ جاتىر. بيىل «گەروين»، «كانابيس»، «اۋعان چارسى» دەپ اتالاتىن 940 كەلىدەن استام اۋىر ەسىرتكى زاتتارىن شەكارادان وتكىزۋ قىلمىسىنىڭ جولى كەسىلدى. سونىمەن قاتار تۇركىستان، جامبىل جانە سولتۇستىك قازاقستان وبلىستارىنىڭ وتكىزۋ پۋنكتەرىندە اسا ءىرى كولەمدە ەسىرتكى زاتتارى تاركىلەندى. ەسىرتكى كونترابانداسىنىڭ بارلىق فاكتىلەرى بويىنشا قىلمىستىق ءىس قوزعالدى، - دەدى ع. ءاعادىلوۆ ورتالىق كوممۋنيكاتسيالار قىزمەتىندە.

سونىمەن قاتار سپيكەر اۋەجايلاردا پاسپورتتىق باقىلاۋدىڭ بيومەترياسى نەگىزىندە اۆتوماتتى تۇردە ءوتۋدىڭ جاڭا تەحنولوگيالارىن ەنگىزۋ جۇمىستارى اتقارىلىپ جاتقانىن ايتتى.

«ماسەلەن، استانا قالاسىنىڭ اۋەجايىندا تەستىلىك رەجيمدە وتاندىق ءوندىرىستىڭ «Q-gate» پاسپورتتىق باقىلاۋدىڭ اۆتوماتتاندىرىلعان جۇيەسى سىناقتان ءوتىپ جاتىر. بۇل باقىلاۋ ءتۇرىن ەنگىزۋگە ونىڭ ەكونوميكالىق تيىمدىلىگى، پاسپورتتىق باقىلاۋدى جۇرگىزۋدىڭ قاۋىپسىزدىگى، جىلدامدىعى جانە ىڭعايلى بولۋى ىقپال ەتتى. بولاشاقتا شەكاراداعى قارقىندى وتكىزۋ پۋنكتەرىن جانە قازاقستان رەسپۋبليكاسىنىڭ ءىرى حالىقارالىق اۋەجايلارىندا وسى جۇيەنى قوسۋ جوسپارلانىپ وتىر»، - دەدى شەكارالىق باقىلاۋ دەپارتامەنتى باستىعىنىڭ ءبىرىنشى ورىنباسارى.

بۇدان بۇرىن حابارلانعانداي، بيىل 7 ايدا قازاقستان شەكاراسىنان 20,5 ميلليون ادام وتكەن.