قازاقستان م م ا الەم چەمپيوناتىندا كوماندالىق ەسەپتە العاش رەت 1-ورىن الدى
11-18- اقپاندا سەربيا استاناسى بەلگرادتا 18-20 جاس ارالىعىنداعى جاستار مەن 21 جاستان اسقان ەرەسەكتەر اراسىندا م م ا بويىنشا الەم چەمپيوناتى ءوتىپ جاتىر.
الەم چەمپيوناتىنا 60 ەلدەن 628 سپورتشى قاتىستى. قازاقستان اتىنان م م ا ۇلتتىق قۇراماسىنىڭ 33 مۇشەسى ونەر كورسەتىپ جاتىر.
16- اقپاندا 18-20 جاستاعى جاستار اراسىنداعى فينالدىق جەكپە-جەكتەر ءوتتى.
جارقىن تەكەتىرەس ناتيجەسىندە قازاقستان قۇراماسىنىڭ قورجىنىندا 3 التىن، 2 كۇمىس جانە 5 قولا مەدال بار.
استانالىق سپورتشى ەرسۇلتان شاكەنباي وتكەن جىلعى چەمپيون اتاعىن راستاپ، ەندى جاستار اراسىندا م م ا بويىنشا ەكى دۇركىن الەم چەمپيونى اتاندى.
ەرسۇلتان 56,7 كەلىگە دەيىنگى سالماقتا ونەر كورسەتەدى. ول فينالدا تاجىكستاندىق لويك يكروموۆتى قىلقىندىرۋ ادىسىمەن جەڭدى.
ايتا كەتەيىك، ەرسۇلتان بارلىق جەكپە- جەكتەرىن مەرزىمىنەن بۇرىن اياقتادى.
اقمولا وبلىسىنىڭ تۋماسى ماتيلدا باچۋرينا (52,2 كەلىگە دەيىن) ءوز مانسابىنداعى الەم چەمپيوناتىنىڭ العاشقى «التىنىن» جەڭىپ الدى.
ول ءبىرىنشى جەكپە-جەگىن قىلقىندىرۋ ادىسىمەن، ال ەكىنشىسىن تەحنيكالىق نوكاۋتپەن اياقتادى.
نەمىس سپورتشىسى سونگيۋل كاراتوراكپەن فينالدىق كەزدەسۋدە تورەشىلەر ءبىراۋىز شەشىمىمەن ماتيلدا جەڭدى.
ماتيلدا م م ا- مەن اينالىسقانىنا ءبىر جىلدان عانا استى، ءبىراق قازىردىڭ وزىندە كەرەمەت ناتيجەلەر كورسەتۋدە.
65,8 كەلىگە دەيىنگى سالماقتا يدريس يدريسوۆ ۇلتتىق قۇراما قورجىنىنا ءۇشىنشى التىندى سالدى.
ول فينالدا بولگاريالىق سۆەتوسلاۆ يۆانوۆتى تورەشىلەردىڭ ءبىراۋىز شەشىمىمەن ۇتتى. يدريس ءۇشىن بۇل م م ا بويىنشا ءبىرىنشى حالىقارالىق جارىس بولدى.
كۇمىس مەدالدى باتىس قازاقستان وبلىسىنىڭ ەكى سپورتشىسى جەڭىپ الدى. 47,6 كەلىگە دەيىنگى سالماقتا گۇلناز ءابدىراحمانوۆا فينالدا امەريكالىق ەبيگەيل الۆارەسپەن كەزدەستى. جەكپە-جەك اياقتالۋعا جاقىن ەدى، ءبىراق ءۇشىنشى راۋندتىڭ سوڭىندا قازاقستاندىق قىلقىندىرۋ ادىسىنە ءتۇسىپ، جەڭىلىسكە ۇشىرادى. 56,7 كەلىگە دەيىنگى سالماقتا وتكەن جىلعى الەم چەمپيونى كارينا سيسەنوۆا فينالدا ۋكراينالىق سپورتشى اناستاسيا حولينكودان تورەشىلەردىڭ شەشىمىمەن جەڭىلىپ، ۆيتسە-چەمپيون اتاندى .
كوماندالىق ەسەپتە قازاقستان قۇراماسى العاش رەت م م ا بويىنشا جاستار اراسىنداعى الەم چەمپيوناتىندا ءبىرىنشى ورىن الدى.
ەرتەڭ، 18- اقپاندا م م ا بويىنشا ەرەسەكتەر اراسىنداعى الەم چەمپيوناتىنىڭ فينالدىق جەكپە-جەكتەرى وتەدى.