اتىراۋ تۇرعىندارىنا 1 مىڭ دانا «جەڭىس» لەنتاسى تاراتىلدى
لەنتادا قازاق حالقىنىڭ ۇلتتىق ويۋ- ورنەگى مەن «وتان سوعىسى» وردەنى بەينەلەنگەن. لەنتانىڭ ءتۇسى - اسپان تۇستەس كوك. بۇل - تاۋەلسىز قازاقستان رەسپۋبليكاسىنىڭ تۋىمەن تۇستەس لەنتا. اتالعان ورتالىق جەتەكشىسى سەرىك قادىروۆتىڭ ايتۋىنشا، اتىراۋ قالاسىندا «جەڭىس» لەنتاسىن تاراتۋ ءۇشىن بىرنەشە ورىن تاڭدالعان. ورتالىق بەلسەندىلەرى لەنتانى مۇنايلى شاھاردىڭ «اۆانگارد» شاعىن اۋدانىندا ورنالاسقان سوڭعى ايالدامادا، تەمىرجول ۆوكزالى مەن «يساتاي- ماحامبەت» ورتالىق الاڭىندا، قالاداعى ءىرى ساۋدا- ويىن ساۋىق ورتالىقتارىندا تاراتتى.
«بۇل لەنتا - ەكىنشى دۇنيەجۇزىلىك سوعىستاعى جەڭىستىڭ سيمۆولى. ويتكەنى، ءبىزدىڭ اتالارىمىز دا قان مايداندا قار كەشىپ، مۇز جاستانا ءجۇرىپ، جاۋمەن شايقاستى. ونىڭ ىشىندە مايدان دالاسىندا قازا تاپقاندارى دا، جەڭىس كۇنىن بەرليندە، ەۋروپانىڭ وزگە قالالارىندا قارسى العاندارى دا بار. وتاندى قورعاۋدىڭ ۇلگىسىن تانىتقان اعا ۇرپاقتىڭ ەرلىگىن ۇمىتپاۋىمىز قاجەت. بۇل - وتانشىلدىقتىڭ جارقىن ۇلگىسى»، - دەيدى ورتالىق جەتەكشىسى سەرىك قادىروۆ.
تۇرعىندارعا «جەڭىس» لەنتاسىن تاراتۋشىنىڭ ءبىرى - قالا تۇرعىنى سامال تاسقىنبايەۆا. ول جىل سايىن جەڭىس كۇنىندە مايداندا قازاق تاپقان بوزداقتاردىڭ رۋحىنا تاعزىم ەتۋ ءۇشىن «ماڭگىلىك الاۋ» مونۋمەنتىنە كەلەدى.
« ءبىز بۇگىنگى بەيبىت كۇنىمىز ءۇشىن مايدان دالاسىندا وپات بولعان بوزداقتاردىڭ رۋحىنا ماڭگى قارىزدارمىز. جىل سايىن وسى لەنتانى قولىما ۇستاعاندا، جانىمدى قويارعا جەر تاپپايمىن. ويتكەنى، مايدان دالاسىنان ورالماعان بوزداقتار بولاشاق ۇرپاعىنىڭ بەيبىت ءومىرى ءۇشىن جانىن قيدى عوي. كەيبىرىنىڭ ارتىندا ۇرپاق تا قالمادى. سول سەبەپتەن، ءبىز قان مايداندا قازا تاپقان قازاق جاۋىنگەرلەرىنىڭ قايتالانباس ەرلىگىنە، وشپەس رۋحىنا باس ءيىپ، قۇرمەتىمىزدى كورسەتۋىمىز كەرەك. بۇگىن «جەڭىس» لەنتاسىن اكەمە دە اكەلىپ بەردىم»، - دەيدى سامال تاسقىنبايەۆا. ەسكە سالا كەتەلىك، بۇدان بۇرىن بالا كەزىندە كونتسلاگەردە تۇتقىندا بولعان 91 جاستاعى كەيۋانا اتىراۋدا تۇراتىنىن حابارلاعان بولاتىنبىز.
اۆتور: بەك مۇستافا