ەلوردادا 1 كەلىدەن استام گاشيش تاركىلەندى

نۇر- سۇلتان. قازاقپارات - ەلوردانىڭ پوليسيا قىزمەتكەرى ءىرى كولەمدە ەسىرتكى ساقتاعان كۇدىكتىنى قولعا ءتۇسىردى.

بۇل جايىندا نۇر- سۇلتان قالالىق پوليتسيا دەپارتامەنتىنەن ءمالىم ەتتى، دەپ حابارلايدى قازاقپارات ءتىلشىسى.

«ەلوردانىڭ پوليسيا قىزمەتكەرلەرى كەلىپ تۇسكەن اقپاراتقا وراي جەدەل ىزدەستىرۋ ءىس- شاراسىن وتكىزىپ، پوتانين كوشەسى بويىندا ەسىرتكى ساقتاعان كۇدىكتىنى ۇستادى. بۇعان دەيىن دە سوتتى بولعان استانانىڭ 37 جاستاعى تۇرعىنىن ءتىنتۋ بارسىندا سالماعى 1 كەلىدەن اساتىن گاشيش تاركىلەندى. ەسىرتكى زاتى ساتۋعا دايىن كۇيدە بۋىپ- تۇيىلگەن. سونىمەن قاتار ۇستالعان كۇدىكتىدەن قولدان جاسالعان پىشاق الىندى»، - دەپ اتاپ وتەدى دەپارتامەنتتەن.

ۆەدومستۆو مالىمەتىنشە، اتالعان فاكتى بويىنشا ق ر ق ك 296-بابى 4-بولىگىمەن سوتقا دەيىنگى تەرگەۋ امالدارى باستالدى. ەسىرتكىنى جەتكىزۋ ارناسىن انىقتاۋ ءىس- شارالارى جۇرگىزىلىپ جاتىر. ايتا كەتەيىك، جىل باسىنان ەلوردا اۋماعىندا زاڭسىز اينالىمنان 53 كەلى ءتۇرلى ەسىرتكى زاتى الىندى. ونىڭ ىشىندە 20 كەلى «گاشيش» جانە 30 كەلى سينتەتيكالىق ەسىرتكى بار.