بۇل تۋرالى بۇگىن ديپلوماتيالىق كورپۋس وكىلدەرىنە ارنالعان بريفينگتە استانا قالاسىنىڭ اكىمى اسەت يسەكەشيەۆ ايتتى، دەپ حابارلايدى قازاقپارات ءتىلشىسى.
«قالا كۇنىنە دايىندىقتىڭ ءۇش توپتاماسى جايىندا ايتىپ بەرگىم كەلەدى. ءبىرىنشىسى شاراعا مادەنيەت جانە سپورت مينيسترلىگى، وزگە دە ارىپتەستەرمەن بىرلەسكەن دايىندىق. ەكىنشىسى - قازاقستان وڭىرلەرىمەن ءوزارا ءىس- قيمىل. ءۇشىنشىسى - شەتەلدىك سەرىكتەستەردىڭ قاتىسۋىمەن وتەتىن شارالار. ءبىرىنشى توپتاما بويىنشا 600 دەن استام شارانى قامتيتىن، جىل بويى وتەتىن ىسكەرلىك، مادەني، سپورتتىق باعدارلامالار جيناقتالعان. ونى ءتۇرلى مينيسترلىكتەر، فەدەراتسيالار، تەاترلار جانە باسقالارى وتكىزەدى» ، - دەدى اكىم.
ونىڭ ايتۋىنشا، بۇل توپتاماعا سيرك، قازىرگى زامانعى مۋزىكا، ۇلتتىق اسپاپتار سالاسىنداعى تەاترلاندىرىلعان شارالار كىرەدى. سونىمەن قاتار ۇلتتىق سپورت تۇرلەرى دە وتكىزىلىپ، قالانىڭ بارلىق قوعامدىق الاڭدارىندا شارالار ۇيىمداستىرىلادى. الداعى ۋاقىتتا بۇل استانانى ىسكەرلىك جانە مادەني تۋريزم ورتالىعى رەتىندە تانىتا تۇسۋگە ءوز سەپتىگىن تيگىزەتىن بولادى.
«2018 -جىلى جىل بويى مادەني شارالارعا 1 ميلليوننان استام قاتىسادى دەپ كۇتىلۋدە. سوندىقتان ينجەنەرلىك- الەۋمەتتىك ينفراقۇرىلىمداردى دايىنداۋ، قاۋىپسىزدىك پەن جايلىلىقتى قامتاماسىز ەتۋ بويىنشا بارلىق دايىندىق جۇمىستارى ءوز دەڭگەيىندە وتكىزىلىپ جاتىر. 200 قوناقۇيدەگى جاتىن ورىندار قوناقتاردى ورنالاستىرۋعا جەتكىلىكتى» ، - دەدى قالا باسشىسى.
ەلوردا اكىمىنىڭ دەرەگىنشە، قالا قوناقتارىنا 1 مىڭنان استام ءدامحانا مەن مەيرامحانا قىزمەت كورسەتەدى. سونىمەن قاتار نەگىزگى ءىس- شارالار وتەتىن ورىندارعا جاڭا اۆتوبۋستارمەن جاساقتالعان شاتل- باستار قاتىنايدى. قاۋىپسىزدىك شارالارىنا دا باسا نازار اۋدارىلىپ، قۇقىق قورعاۋ ورگاندارىنىڭ 2,5 مىڭنان استام قىزمەتكەرى 1-10 شىلدە ارالىعىندا كۇشەيتىلگەن رەجىمدە جۇمىس ىستەيدى. قوسىمشا قاۋىپسىزدىك شارالارىن قامتاماسىز ەتۋگە ۇلتتىق ۇلاننىڭ اسكەري قىزمەتشىلەرى دە جۇمىلدىرىلادى.
«اۋلا ايماقتارىن، ساياباقتار مەن گۇلزارلاردى قوعامدىق الاڭداردى اباتتاندىرۋ بويىنشا دا اۋقىمدى جۇمىس جۇرگىزىلىپ جاتىر. ماسەلەن، ەلوردا كۇنىندە 100 دەن استام، ال جالپى وسى جىلى 400 گە جۋىق اۋلانى تاپسىرۋدى جوسپارلاپ وتىرمىز. ولاردىڭ باسىم بولىگىن «رۋحاني جاڭعىرۋ» باعدارلاماسى اياسىندا جەكە ينۆەستورلاردىڭ قاراجاتىنا اباتتاندىرۋ جوسپارلانعان. ەلوردا كۇنىنە وراي 7 جاڭا ساياباق پەن گۇلزار اشىلىپ، 40 مىڭنان استام اعاش وتىرعىزىلماق» ، - دەدى اسەت يسەكەشيەۆ.