مامانداردىڭ ايتۋىنشا، مۇنداي ازاماتتار وبلىسىمىزدا العاش رەت ارنايى قۇجاتقا يە بولىپ وتىر. ياعني، بۇگىنگە دەيىن تەك 2-3 -توپتاعى مۇگەدەكتەرگە جۇرگىزۋشى كۋالىگى بەرىلسە، ءبىرىنشى توپتاعىلاردىڭ قولى ەندى جەتكەن، دەپ حابارلايدى قازاقپارات ءتىلشىسى.
«كولىك جۇرگىزۋ كۋالىگىن الۋدا مۇگەدەكتەر ءۇشىن ەش جەڭىلدىك جوق. وزگەلەر سەكىلدى مەديتسينالىق تەكسەرۋدەن ءوتىپ، ءىس-تاجىريبەلەرى مەن تەوريالىق بىلىمدەرى سىنالادى. تەك كەزەكسىز قىزمەت كورسەتىلەدى»، - دەيدى وبلىستىق حالىققا قىزمەت كورسەتۋ ورتالىعىنىڭ باس مامانى اينا فايزۋلدينا.
مۇمكىندىگى شەكتەۋلى جاندار تىزگىندەيتىن كولىكتىڭ ەرەكشەلىگى قولمەن باسقارۋ جۇيەسى بولىپ وتىر. زاۋىتتاردا ارنايى قۇرىلعىنى ورناتۋ قۇنى 800 دوللار تۇرادى ەكەن. ال، مۇنداي جۇيەسى بار كولىكتەر وكىنىشكە وراي تالدىقورعاندا ساناۋلى. شاھاردا قولمەن باسقارۋ جۇيەسى بار كولىكتىڭ 15 ى عانا بار. ولارداعى باسقارۋ قۇرالى زاۋىتتىكى ەمەس، قولدان قۇراستىرىلعان. بۇل از، - دەيدى «ەرلىك» مۇگەدەكتەر قوعامىنىڭ ءتورايىمى روزا اقجاركەنوۆا.
العا قويعان ماقساتىنا قول جەتكىزىپ، كولىكتى تىزگىندەۋگە وتىرعان جانداردىڭ ءبىرى ەلميرا سماعۇلوۆا مەن روزا اقجاركەنوۆا. ولار 1- توپتاعى مۇگەدەكتەر. ارباعا تانىلعان جاندار الداعى ۋاقىتتا ارنايى قۇرىلعىسى ورناتىلعان كولىكتەر سانى تالدىقورعاندا كوبەيسە دەپ تىلەيدى.