قىتايلىق كاسىپورىن قوستانايعا 1 ميلليارد دوللاردان استام ينۆەستيتسيا سالادى

قوستاناي. قازاقپارات - «سارىارقا اۆتوپروم» زاۋىتى، China National Vehicle Import and Export Company جانە «Kazakhexport» ەكسپورتتىق ساقتاندىرۋ كومپانياسى» ا ق اراسىندا ىنتىماقتاستىق مەموراندۋمىنا قول قويىلدى، دەپ حابارلايدى قازاقپارات ءتىلشىسى.

قول قويۋ راسىمىنە قوستاناي وبلىسىنىڭ اكىمى ارحيمەد مۇحامبەتوۆ، قازاقستاننىڭ دامۋ بانكىنىڭ ءتوراعاسى بولات جامىشيەۆ، «الليۋر» كومپانيا توبى» ا ق باسقارماسى ءتوراعاسى يۋري تسحاي، General Technology Group كومپانياسىنىڭ وكىلى ۆانگ سۋ شەنگ قاتىستى.

وبلىس اكىمى ارحيمەد مۇحامبەتوۆ قىتايلىق كومپانيا قوستانايعا 1 ميلليارد 200 ميلليون دوللار ينۆەستيتسيا قۇياتىنىن ايتتى.

«بۇل از قارجى ەمەس. General Technology Group كومپانياسى الەمدەگى الەۋەتتى 500 كاسىپورىننىڭ ىشىنە كىرەدى. سوڭعى جىلى قوستانايداعى اۆتوموبيل شىعارۋ ءىسى 4 پايىزعا ارتتى. وسى قارقىندا جۇمىس ىستەي بەرسەك، وتاندىق اۆتووندىرىس سالاسىن كەڭەيتىپ، الەمدىك نارىققا ەمىن-ەركىن شىعامىز»، - دەدى ءوڭىر باسشىسى.

بۇگىندە اۆتونارىقتا باسەكەلەستىك جوعارى. جوسپار بويىنشا «سارىارقا اۆتوپروم» زاۋىتى جىل سوڭىنا دەيىن التى مىڭ دانا كولىكتى ساتىلىمعا شىعارۋعا ىنتالى.

«الليۋر» كومپانياسى توبى» ا ق ديرەكتورلار كەڭەسى ءتوراعاسى اندرەي لاۆرەنتيەۆتىڭ ايتۋىنشا، ءۇشجاقتى ارىپتەستىك ناتيجەسىندە «سارىارقا اۆتوپروم» ج ش س JAC اۆتوكولىكتەرىن رەسەي نارىعىنا شىعارۋ قۇقىعىنا يە بولادى.

«بۇگىنگى مەموراندۋم ەلباسىنىڭ قولداۋىمەن جۇزەگە اسىرىلىپ وتىر. كاسىپورىن قىتاي، وزبەكستان سياقتى ەلدەرمەن تىعىز بايلانىستا. سوڭعى جەتى جىل ىشىندە زاۋىت 30 مىڭ اۆتوكولىك قۇراستىردى. بارلىعى 41,6 ميلليارد تەڭگەنىڭ ونىمدەرى ءوندىرىلدى»، - دەدى يۋريي تسحاي.

قازاقستاننىڭ دامۋ بانكىنىڭ ءتوراعاسى بولات جامىشيەۆ تە بۇگىنگى مەموراندۋمنىڭ ماڭىزىنا توقتالدى. ونىڭ سوزىنشە، ماشينا قۇراستىرۋ ءىسى ەل ەكونوميكاسىن دامىتۋدىڭ باستى تەتىگىنە اينالدى.