قازاقستاندا 1 شاقىرىم جولدىڭ قۇرىلىسىنا قانشا قارجى جۇمسالادى
بۇل تۋرالى بۇگىن ق ر ي د م اۆتوموبيل جولدارى كوميتەتى ءتوراعاسىنىڭ ورىنباسارى ساتجان ابلاليەۆ ءمالىم ەتتى، دەپ حابارلايدى قازاقپارات.
«رەسەيمەن سالىستىرساق، بىزدە جول قۇرىلىسىنىڭ قۇنى 30-35 پايىزعا تومەن، ال قىتايعا قاراعاندا 70 پايىز ارزان بولىپ تۇر. بۇل ەلدىڭ گەوگرافيالىق جاعدايىنا، پايدالانىلاتىن ماتەريالداردىڭ باعاسىنا، سالىناتىن جولدىڭ سيپاتتاماسىنا قاراي بايلانىستى بولادى. كوپ ەلدەردە جولدار ۋاقتىلى جوندەلگەننەن كەيىن، وعان جۇمسالاتىن قارجى كوپ بولمايدى. بىزدەگى جولدار وتكەن 80- جىلدارى سالىنعان، ياعني ولاردى تولىقتاي بۇزىپ، قايتادان قۇرىلىس جۇرگىزىپ جاتىرمىز»، - دەدى ساتجان ابلاليەۆ «قازاقپارات» تىلشىسىنە بەرگەن سۇحباتىندا.
ايتا كەتەيىك، بۇگىن پارلامەنت سەناتى ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا قر ينۆەستيتسيالار جانە دامۋ ۆيتسە- ءمينيسترى تيمۋر توقتابايەۆ «جەتىباي- جاڭاوزەن» جول ۋچاسكەسىن قارجىلاندىرۋدىڭ ءمان-جايىن ءتۇسىندىرىپ بەرگەن بولاتىن.
ءوز كەزەگىندە ساتجان ابلالييەۆ سالىناتىن جولدىڭ قۇنىنا توقتالا كەلە، ول جولدىڭ ساناتىنا قۇرىلىس جۇرەتىن وڭىرگە نەمەسە جەردىڭ بەدەرىنە بايلانىستى بولاتىنىن اتاپ ءوتتى. «جەتىباي- جاڭاوزەن» جول ۋچاسكەسى جوباسىندا 1 شاقىرىمى (ءبىرىنشى ساناتتاعى ءتورت جولاقتى جول) 1,2 ميلليون دوللار شاماسىندا، ياعني 400 ملن تەڭگە كولەمىندە.
«باسقا وڭىرلەردە ەلدى مەكەندەرگە جاقىن جەرلەردە جانە جاساندى قۇرىلىستار كوپ جەرلەردە جول قۇرىلىسىنىڭ قۇنى 600 ميلليون تەڭگەگە دەيىن جەتەدى»، - دەدى س. ابلاليەۆ.
اتالعان قارجى 73 شاقىرىم ارالىقتاعى ءتورت جانە ەكى جولاقتى قوزعالىسى بار اسفالت- بەتوندى جولدىڭ قۇرىلىسىنا باعىتتالادى. سونىمەن قاتار ءبىر جول ايرىعى، ەكى كوپىر، 19 سۋ وتكىزۋ قۇبىرى سالىنادى. جوبا 2017-2019 -جىلدارى جۇزەگە اسىرىلادى.