قالالىق ءبىلىم بەرۋ باسشىسىنىڭ مىندەتىن اتقارۋشى ءانۋار جانعوزيننىڭ، سوزىنە قاراعاندا، وتكەن وقۋ جىلى استانانىڭ مەكتەپتەرىندە 9588 ورىنعا جەتىسپەۋشىلىك بايقالعان، بيىل بۇل كورسەتكىش 17 مىڭدى قۇراۋى مۇمكىن.
«1-سىنىپقا كەلەتىن وقۋشىلاردىڭ سانى كۇرت وسۋىنە (بولجام بويىنشا 22 مىڭ وقۋشى) جانە كوشى- قون ماسەلەسىنە (4500 وقۋشى) بايلانىستى 2017-2018 وقۋ جىلىندا بولجام بويىنشا 17 مىڭ ورىنعا جەتىسپەۋشىلىك سەزىلۋى مۇمكىن»، - دەدى ءا. جانعوزين.
وعان قوسا استانا اكىمدىگىمەن مەكتەپتەر مەن باقشالاردا ورىن جەتىسپەۋشىلىگى ماسەلەسى كەشەندى تۇردە شەشىلۋدە. وسىلايشا 2017-2018 وقۋ جىلى 2600 ورىنعا شاقتالعان جاپسارلاس سالىنعان 5 مەكتەپتى پايدالانۋعا بەرۋ جوسپارلانعان. سونداي- اق ەلوردادا جىل سايىن كەم دەگەندە 10 جاڭا مەكتەپ سالىناتىن بولادى.
«6 مەكتەپتىڭ قۇرىلىسى باستالدى، جىل سوڭىنا دەيىن 4 ءبىلىم ورداسىن سالۋ جوسپارلانۋدا. جالپى العاندا 11 مىڭ ورىنعا ارنالعان 10 مەكتەپ سالىنادى، ول 2018-2019 -جىلدارى پايدالانۋعا بەرىلەدى. وعان قوسا 13 مەكتەپتىڭ جوباسىن ىسكە اسىرۋ بويىنشا جۇمىس باستالىپ كەتتى. ءبىزدىڭ جوسپارىمىز - جىل سايىن 13-14 مەكتەپتى پايدالانۋعا بەرۋ»، - دەدى ا. جانعوزين.
قازىرگى تاڭدا ەلوردادا 95 جالپى ءبىلىم بەرەتىن مەكتەپ ورداسى بار، وندا 130542 وقۋشى ءبىلىم الادى. سونىمەن بىرگە بالالاردىڭ كوبىسى مەملەكەتتىك مەكتەپتەرگە بارادى. 84 ءبىلىم ورداسىندا 127 مىڭعا جۋىق وقۋشى ءبىلىم الادى. 11 جەكە مەكتەپتە 3625 وقۋشى وقيدى. ورىن جەتىسپەۋشىلىك قالانىڭ 27 مەكتەبىندە ساقتالدى (3 مەكتەپتە ساباق ءۇش اۋىسىممەن وتكەن).