استانادا جىلىنا شەتەلدىك تۋريستەر سانى 1 ميلليون ادامعا جەتەدى
بۇل تۋرالى بۇگىن تۋريزم جانە بولاشاق ەنەرگياسىنا ارنالعان حالىقارالىق كونفەرەنسيادا ەلوردا اكىمى اسەت يسەكەشەۆ ءمالىم ەتتى، دەپ حابارلايدى قازاقپارات.
«تۋريزمنىڭ ماڭىزدىلىعىن وزگە دە مەگاپوليستەر ۇلگىسىندە ءتۇسىنىپ وتىرمىز، ياعني وسى سالانىڭ شاعىن جانە ورتا بيزنەستى قولداۋعا، جاڭا جۇمىس ورىندارىن قۇرۋعا قالاي اسەر ەتەتىنىن بىلەمىز. جاقىندا بريتاندىق بەدەلدى باسىلىمنىڭ استانا تۋريزم ءۇشىن ەڭ تارتىمدى قالالاردىڭ ءبىرى بولا الاتىندىعىن مويىنداۋى بەكەردەن ەمەس. سوندىقتان دا حالىقارالىق كومپانيانى تارتۋ ارقىلى استانادا ءتۋريزمدى دامىتۋ تۇرعىسىندا ءتيىستى جوسپاردى ازىرلەۋدەمىز. قازىرگى كەزەڭدە قالادا وسى سالانى دامىتۋدىڭ ءۇش نەگىزگى باسىمدىقتارىن ايقىندادىق. بىرىنشىدەن، وقيعالىق-ىسكەرلىك تۋريزم، ەكىنشىدەن، رەكرەاتسيالىق تۋريزم، ۇشىنشىدەن، مەديتسينالىق تۋريزم ەسكەرىلىپ وتىر»، - دەدى اكىم حالىقارالىق كونفەرەنتسيادا.
ونىڭ سوزىنە قاراعاندا، 2020-جىلعا قاراي استانانى ەۋرازيالىق كەڭىستىكتە ەڭ تارتىمدى ءارى اسەرلى قالالاردىڭ قاتارىنا قوسۋ جوسپاردا بار.
«استانا فورۋمدار، سامميتتەر، ىسكەرلىك كونفەرەنتسيالار مەن مادەني-سپورتتىق شارالاردى وتكىزۋدە نەگىزگى ورتالىقتاردىڭ ءبىرى بولۋى كەرەك. ول ءۇشىن شاھار بارلىق قاجەتتى ساپالى ءارى دامىعان ينفراقۇرىلىمدى دايىنداپ قويدى، ياعني اۋەجاي مەن ۆوكزالدىڭ جانە باسقا دا نىسانداردىڭ الەۋەتى جوعارى. ءبىز شەتەلدىك تۋريستەر سانىن جىلىنا 1 ميلليونعا دەيىن، ال قازاقستاندىق تۋريستەردىڭ ۇلەسىن 2 ميلليونعا دەيىن جەتكىزۋ ماقساتىن قويىپ وتىرمىز. وسى ورايدا تۋريستەردىڭ جالپى سانىن ءۇش ەسەدەن استامعا ارتتىرۋ كوزدەلىپ وتىر»، - دەدى يسەكەشەۆ.
اۆتور: رۋسلان عابباسوۆ